Ashtu siç ndodhi me mikun e tij Harun Çelik, turku Selami Simsek i frikësohet një dëbimi të mundshëm drejt Turqisë nga autoritetet shqiptare.
Përmes avokatit të tij, shtetasi i dënuar me 18 muaj burg për akuzën e “Falsifikimit të letërnjoftimeve, i pasaportave ose i vizave”, i ka dërguar një letër drejtorisë së kufirit dhe emigracionit në Shqipëri, që të mos e dëbojnë në Turqi. Arsyeja është fakti se atij i rrezikohet jeta në vendin e origjinës për shkak se është mbështetës i Gulen.
Letra argumenton se autoritetet shqiptare nuk duhet ta dëbojnë derisa të jepet një vendim për kërkesën e azilit që Simsek ka depozituar.
Kujtojmë se në fillim të këtij viti, mësuesi turk Harun Çelik u dëbua në mënyrë mjaft të dyshimtë nga autoritetet shqiptare drejt Turqisë, atje dhe ku u burgos më pas nga autoritetet. Ashtu si Harun Çelik edhe Simsek u kap në aeroportin e Rinasit, në tentativë për t’u larguar drejt Kanadasë me një pasaportë false.
