Shefi i Komisariatit Librazhd dhe 9 efektivë të tjerë policie janë pezulluar nga detyra me akuzën e shpërdorimit të detyrës.
Dyshohet se nga ana e punonjësve të policisë është lejuar kultivimi i bimëve narkotike.
SHÇBA ekzekutoi vendimet e Gjykatës së Rrethit Gjyqësor Elbasan për caktimin e masave të sigurisë për 10 punonjës të policisë në Drejtorinë Vendore Elbasan dhe Komisariatin e Policisë Librazhd.
"Gjykata ka caktuar për ta, masën e sigurimit ndalues ndaj personit në hetim “Pezullimin nga ushtrimi i detyrës“, si person i dyshuar për veprën penale të parashikuar nga neni 248 i Kodit Penal si person përgjegjës për menaxhimin, monitorimin, koordinimin dhe kontrollin e strukturave për zbatimin e planit të masave në parandalimin dhe goditjen e veprimtarisë kriminale të kultivimit të lëndëve narkotike", sqaron policia.
U pezulluan nga detyra
- K/komisar B.H., 52 vjeç, me detyrë Shef i Komisariatit Librazhd;
- K/komisar A.H., 48 vjeç, me detyrë Shef i Qarkullimit Rrugor në Drejtorinë Vendore të Policisë Elbasan;
- Komisar A.K., 40 vjeç, me detyrë Shef për Hetimin e Krimeve në Komisariatin e Policisë Librazhd;
- Komisar L.Z., 40 vjeç, me detyrë Shef Seksioni për Rendin në Komisariatin e Policisë Librazhd;
- N/komisar E.A., 44 vjeç, me detyrë Specialist për Hetimin e Krimeve;
- N/komisar G.H., 40 vjeç, me detyrë Specialist për Hetimin e Krimeve;
- N/komisar Y.Z., 51 vjeç, me detyrë Specialist për Hetimin e Krimeve në Drejtorinë Vendore të Policisë Elbasan;
- Inspektor K.Q. 46 vjeç,me detyrë Ndihmës Specialist për Policimin në Komunitet;
- Inspektor Z.C., 51 vjeç, me detyrë Ndihmës Specialist për Policimin në Komunitet;
- Inspektor I.D., 52 vjeç, me detyrë Ndihmës Specialist për Policimin në Komunitet.
