Pa Cristiano Ronaldo, Juventus ndal hapin dhe tani rrezikon parakalimin nga Inter. Nuk mjaftoi penalltia e Dybala, menjëherë e anulluar nga një tjetër goditje nga pika e bardhë e Mancosu. Barazimi i dytë në 9 javë për torinezët, që me 23 pikë rrezikojnë tani të shohin zikaltrit, në rast fitore me Parmën, ti kalojë një pikë përpara.
Fillimi i pjesës së parë ka parë një Lecce brilante e ndonjë gabim të tepërt të bardhezinjve, por me kalimin e minutave Juve mori plotësisht kontrollin e ndeshjes. Përvec një goli të anulluar Higuain për pozicion jashtë loje, kampionët e Italisë patën edhe raste të tjera për të shënuar. Një mrekulli e Gabriel, i mohoi Dybala një super gol që në pjesën e parë, ndërsa protesta e bardhezinjve për një 11 metërsh të padhënë, në kontaktin mes Tachtsidis e Emre Can, nuk e bënë Valeri të kërkonte as rishikimin me Var.
Pjesa e dytë është krejt ndryshe, me shumë ritëm dhe ... gola. Juventus mori avantazhin me një penallti të shndërruar në gol nga Dybala, mes protestave të salentinëve: faull i Petriccione ndaj Pjanic u vlerësua fillimisht goditje dënimi në hyrje të zonës, pastaj me Var ndryshoi mendje. Gati i menjëherëshëm barazimi i Lecce, gjithnjë me penallti, me Mancosu (prekje me krah e De Ligt në zonë). Presioni i bardhezinjve është i gjithi në shtyllën e Bernardeschi, ndërsa Higuain i gjakosur në një përplasje me portierin, tentoi befasinë në minutën e 96, por pa arritur të superojë Gabriel.
