Gjykata ka pushuar procedimin penal të bërë nga kreu i grupit parlametar të Partisë Socialiste, Taulant Balla, për kallëzim të rremë ndaj kreut të Partisë Demokratike, Lulzim Basha për çështjen “Xhisiela Maloku”.
Ka qenë organi i akuzës që ka bërë kërkesë për të pushuar çështjen në fjalë. Ndërkohë, instanca e gjykimit ka miratuar pretendimin e akuzës duke marrë vendim të formës së prerë më datë 18 shtator.
Më 27 shtator të vitit të kaluar Balla depozitoi në Prokurori kallëzimin penal për kryedemokratin Basha, të cilin e akuzonte për veprat penale “shpërdorim detyre” dhe “kallëzim të rremë”. Kallëzimi erdhi pas denoncimit të ish-oficerit të Krujës, Emiljano Nuhut, i cili pretendonte se është kërcënuar me armë për të mbyllur dosjen e djalit të deputetit të PS-së, Rrahman Rrahja, në prani të Ballës.
Djali i deputetit Rrahja, Rexhep Rrahja akuzohej nga ish e dashura e tij, Xhisiela Maloku, se e kishte dhunuar, por në një letër publike drejtuar presidentit, kryeministrisë dhe Prokurorisë, si edhe në disa intervista televizive, oficeri Nuhu deklaroi se Balla ka qenë i pranishëm në momentin kur familjarë të kolegut të tij socialist i kanë vendosur në kokë pistoletën me qëllim ndalimin e arrestimit të të akuzuarit.
Gjithashtu, Balla kallëzoi penalisht për “këllzëim të rremë” edhe ish-oficerin Nuhu, si dhe gazetarin Basir Çollaku që realizoi intervistën.
