"Nuk ka asgjë për të folur, përvecse të ulemi në tryezë dhe të bisedojmë për strategjitë e të ardhmes, të flasim për Nations League dhe mënyrën si do të përballemi me fushatën e ardhshme eleminatore". Pak fjalë të thëna nga presidenti i FSHF-së, Armand Duka, por me një mesazh të qartë brenda: Edy Reja është tekniku i ardhshëm i kuqezinjve dhe rinovimi për numrin 1 të futbollit shqiptar është burokraci. Tekniku italian vetëm një ditë më parë, në konferencë për shtyp, e kishte bërë të qartë vullnetin e tij për të vazhduar me Shqipërinë, por kishte thirrur në cështje presidentin, përgjigja e të cilit nuk vonoi.
Në fund, për fitoren rekord të kuqezinjve Duka u shpreh: "Tani që ka mbaruar, duket e lehtë me 4 gola. Por, deri sa të fillonte ndeshja, ishim në tension. Sot nuk ka ndeshje të lehta. Rezultat historik. Në të dyja ndeshjet, ekipi ishte i përgatitur që të luante gjithçka. Fati na dënoi, në Turqi meritonim diçka më shumë. Djemtë kanë punuar mirë, kanë rikthyer besimin te vetja".
