Krahasimet nuk janë asnjëherë të bukura, por shpeshherë të paevitueshme, si në rastin e teknikut të kombëtares Edy Reja me atë të paraardhësit të tij Christian Panucci. Në fakt nuk flitet këtu për eksperiencë e CV, sepse 73 vjecari ka një jetë që mëson të luajnë futboll, por situatat e ngjashme, lëvizjet e vazhdueshme në kërkim të formacionit ideal dhe rezultatet e marrë nga dy italianët në drejtimin e kuqezinjve.
Disfata me Francën nuk mund të kalohet lehtë, jo sepse nuk prisnim të mundëshim nga kampionët e Botës, por sepse skuadra ishte e shthurur, e paaftë të organizohej (vetëm penalltia ishte goditje drejt portës në 90 minuta) dhe me probleme të theksuara në aplikimin e skemës 3-5-2 ku Roshi i preferuar për Lenjanin, ishte fajtor në pësimin e të paktën dy golave: "Është përgjegjësi e imja, mendoja se do të bënte mirë - bëri mea culpa tekniku pas ndeshjes -. Mendoja se me 3 mbrapa mund të impenjonte më shumë Francën. I kërkova gjëra që nuk janë në kapacitetin e tij”.
Një pranim faji, që në fakt nuk i vlen askujt sepse pak ditë përpara përplasjes shumë të rëndësishme me Islandën, kuqezinjtë shkojnë të dërrmuar e me moralin përtokë. Një situatë e ngjashme me atë në kohën kur në krye të pankinës ishte Panucci, që u kritikua mbi të gjitha për mungesën e një formacioni fiks dhe rezultate negative. Të njëjtat simptoma që janë shfaqur edhe me 73 vjecarin, pavarësisht ndryshimit në komunikim dhe dialogun me lojtarët...
E atëherë krahasimet dalin në plan të parë. Panucci e mori skuadrën nga Gianni de Biasi, i cili pasi kaloi një periudhë të zezë, e dorëzoi tek ish-mbrojtësi i Milan me një fitore impresionuese 0-3 në Izrael. E njëjta gjë edhe për Reja, që erdhi në detyrë, pasi skuadra kaloi errësirën e rezultateve me fitoren 3-0 në Andorra, me Ervin Bulkun e Sulejman Memën teknikë tranzitorë.
E sa për rezultatet bilanci i Edy Reja është më negativ se ai i Panuccit pas tre ndeshjeve të para në pankinë. Ish-mbrojtësi kaloi 2-0 Lichtenstein, shkoi dhe barazoi në Maqedoni dhe u mposht nga Spanja 3-0 në transfertë. 4 pikë në tre ndeshje, një më shumë se Reja që e nisi debutimin me humbjen në Islandë 1-0, fitoi 2-0 në shtëpi me Moldavinë, përpara se të dorëzohej pa kushte 4-1 përballë Francës.
Jo shumë premtuese po të shohësh edhe plusvalencën e golave: 3 të shënuar e pesë të pësuar me Reja, kundër 3 të shënuar e katër të pësuar me Pannucci në pankinë.
