Furtunë e parashikuar nga sistemimi funksionues i presidentit të Kukësit, Safet Gjici. Eleminimi me Debrecen do të kishte pasoja dhe të forta madje. E kishte kuptuar i pari tekniku Ernest Gjoka, që pas 3-0 në Hungari, pasuar nga kërkesa frontale e numrit 1 të klubit: "Dua përmbysjen". Përmbysje nuk pati dhe Gjoka u shkarkua (pa ceremoni): "Ne trajnerët jemi me valixhe në dorë", deklaroi tekniku pas ndeshjes, duke aluduar për mundësinë e shkarkimit, por në fakt e vërteta është ndryshe.
Burime brenda klubit kuksian kanë saktësuar për Lapsi.al se trajneri fitues i Kupës së Shqipërisë në sezonin e kaluar u shkarkua që para ndeshjes nga presidenti Gjici. Madje tensionet arritën në një pikë sa kërkoi që Gjoka të mos ishte fare në pankinë për ndeshjen e kthimit në Europa League, duke ia kërkuar detyrën drejtorit sportiv Nderim Nexhipi. "Edhe nëse do kualifikohej Kukësi, vendimet ishin marrë" sqaroi burimi.
Pas ndeshjes Gjici nuk ka zbritur në dhomat e zhveshjes, për të vetmin motiv sepse vendimet për shkarkimet e largimet ishin bërë përpara. Arbër Cyrbja, pas një sezoni mes shumë dëmtimesh e problemesh fizike e dinte fare mirë se ishte ndeshja e fundit me Blutë. Lojtari megjithatë ka falenderuar klubin me një story në Instagram, duke konfirmuar largimin.
Por situata është edhe më e rëndë: "Kush nuk luan si duhet të marrë me vete cantën në fund të ndeshjes" raportohet të ketë thënë Gjici dhe në rrugën e daljes janë edhe Ylli Shameti, pavarësisht se zyrtarisht qendërmbrojtësi ishte me temperaturë. Shameti ka vuajtur shumë dëmtimet në sezonin që u mbyll dhe Gjici e kishte humbur prej kohësh durimin me gjirokastritin.
Edhe Valdet Rama, ylli i bujshëm i kuksianëve në janarin e kaluar është drejt ikjes. Numri 99 kërkon të largohet me cdo kusht, por po vuan presionin e Gjicit për ta mbajtur në skuadër me cdo kusht. Rama nuk ndihet mirë në skuadër dhe e ka bërë të qartë se pas ndeshjeve Europiane do të largohet jashtë Shqipërisë. Por furtuna e Gjicit mund të përfshijë edhe një njeri të besuar të presidentit. DS Nexhipi ka debatuar ashpër me presidentin në lidhje me merkaton dhe e ka marrë paralajmërimin. Situata në këtë moment është stabël me të dy që janë në periudhë reflektimi, por dicka është thyer dhe vështirë se ngjitet më.
