Aleanca për Mbrojtjen e Teatrit Kombëtar ka denoncuar paraditen e sotme heqjen e gërmave identifikuese nga ballina e godinës së këtij objekti të jetës kulturore kryeqytetase, që gjendet prej muajsh jashtë funksionit.
Përmes një postimi në faqen zyrtare në rrjetin social “Facebook”, Aleanca drejton gishtin e përgjegjësisë për aktin në fjalë ndaj qeveritarëve, duke i fajësuar ata për grabitjen dhe tjetërsimin e pronës publike, për llogari të interesave të tyre financiare. “Godinës së Teatrit Kombëtar sot natën, si hajdutë ordinerë, i kanë zhveshur gërmat. Është turp dhe mjerim i madh që jemi katandisur të qeverisemi nga njerëz që pronën publike dhe pasuritë kombëtare i shohin veç si mall që duhet grabitur në funksion të pasurisë së tyre. Turp!” – shkruhet në postimin e Aleancës, bashkëngjitur fotos që dëshmon shkuljen e gërmave prej godinës së Teatrit.
Ngjarja është shoqëruar edhe me reagimin e menjëhershëm të komunitetit të aktorëve, të cilët ende vijojnë për çdo pasdite qendresën e tyre kundër shembjes së Teatrit Kombëtar.
