Ish-deputeti i PD, Astrit Patozi, i cili së fundmi ka krijuar një forcë të re politike, të quajtur "Bindja Demokratike", tregon se kjo parti e legjitimuar tashmë do të marrë pjesë në zgjedhjet lokale të 30 qershorit.
Patozi, teksa ka falenderuar të gjithë ata që kanë firmosur për krijimin e kësaj force të re politike, ka shtuar se rrëzimi i "partitokracisë" dhe ndryshimi i sistemit aktual duhet të jenë arsyet pse qytetarët duhet të votojnë në këto zgjedhje partinë e përfaqësuar prej tij.
"Falenderime, mirënjohje dhe respekt për ata mijëra burra dhe gra nga e gjithë Shqipëria, që nëshkruan në kohë rekord, por edhe e mbështetën duke e uruar që në ditën e parë lindjen e "BINDJES DEMOKRATIKE"!
Ata janë themeluesit e saj të vërtetë, ndaj të cilëve do të ndjehemi të detyruar gjithmonë.
Koha do të tregojë shumë shpejt se ne bëmë gjënë e duhur në një kohë të vështirë për vendin, pasi krijuam BINDJEN se ishte çasti që të merrnim të gjitha përgjegjësitë tona.
Por deri atëherë, ne do të rendim me shpejtësi, duke ftuar të na bashkohet çdo qytetar që kërkon ndryshimin e kësaj gjendjeje dëshpëruese në Shqipëri për shkak të sistemit dhe qeverisjes së gabuar.
Ka ardhur momenti që secili prej nesh duhet të marrë një vendim për të dhënë një kontribut që ta rrëzojmë partitokracinë, sepse ajo ushqen autoritarizmin, korrupsionin, abuzimin me pushtetin, padrejtësinë dhe pabarazinë e frikshme para ligjit", është shprehur Patozi.
