Protesta e radhës së opozitës para Parlamentit do të jetë më datë 5 mars, ditën kur maxhoranca do të të thërrasë një tjetër seancë plenare në Kuvend. Por për momentin nuk është saktësuar akoma ora e mbajtjes së seancës. Gjasat janë që ajo të zhvillohet paradite duke patur parasysh atë që ndodhi mbrëmjen e kaluar.Lapsi.al mëson se ish-ministri i Brendshëm, Fatmir Xhafaj ka sugjeruar që seanca të zhvillohet paradite sepse në këtë mënyrë mund të jetë më e menaxhueshme edhe protesta e opozitës.
Xhafaj e ka shprehur këtë opinion në diskutimet që zhvilloi me kolegët socialistë në Kuvend një natë më parë teksa protestuesit e opozitës tentonin të hynin brenda. Vendimi për seancën plenare të datës 5 mars është marrë nga Konferenca e Kryetarëve. Gjithashtu Konferenca e Kryetarëve vendosi dhe seancën tjetër të radhës më 13 mars si dhe anulimin e seancës të parashikuar për nesër.
Aksioni opozitar do të jetë i tillë që sa herë të ketë seancë parlamentare protestuesit do mblidhen para parlamentit. Sot krerët e opozitës u takuan me një delegacion nga Parlamenti Europian, por në përfundim ata thanë se s'kanë ndërmend të tërhiqen pa rrëzuar Edi Ramën. Vendi është futur në një krizë politike pas vendimit ekstrem të opozitës për djegien e mandateve.
©LAPSI.al
