Kryetari i Lidhjes Demokratike të Kosovës, Isa Mustafa referuar disa sjelljeve të shtetit serb është shprehur se ata nuk janë të interesuar për normalizimin e marrëdhënieve me Kosovën dhe as për ta njohur si shtet.
Sipas tij, sjellja që po bën Serbia në arenën ndërkombëtare duke e sulmuar Kosovën nuk përkon me kërkesën e BE-së dhe SHBA-ve për arritjen e marrëveshjes përfundimtare, me njohje reciproke.
Reagimi i plotë i Isa Mustafës
Serbia po krenohet me dëmet që po na i shkakton në arenën ndërkombëtare.
Politikat e fqinjësisë së mirë, paqes dhe stabilitetit, për të cilat janë zotuar vendet e Ballkanit Perëndimor bien ndeshë me një sjellje të tillë. Kjo sjellje nuk ka asgjë të përbashkët edhe me kërkesën e BE-së dhe SHBA-ve për arritjen e marrëveshjes përfundimtare, me njohje reciproke.
Prandaj do të ishte mirë të lihet anash mentaliteti i trashëguar armiqësor dhe të punohet për të kultivuar një mjedis në të cilin punojmë për prosperitet të qytetarëve tanë.
