Vijon beteja ligjore mes kreut të grupit parlamentar të Partisë Socialiste, Taulant Balla me djalin e ish-kryeministrit Sali Berisha, Shkëlzenin. Pas seancës gjyqësore në një deklaratë për median Shkëlzen Berisha është shprehur se nuk ka asnjë provë që e implikon atë për evazion fiskal, ndryshe nga çfarë pretendon Taulant Balla.
Ai madje ka akuzuar kreun e grupit të PS-së se ka udhëtuar me trafikant droge, duke përmendur dhe një emër konkret, Edmond Begon.
Sipas tij, trafikanti i drogës Edmond Bego nuk arrestohet për shkak se mbrohet prej maxhorancës.
“Nuk ka asnjë provë që pretendohet për evazionin fiskal. U përpoq të rikthente vëmendje në komisionin e dështuar parlamentar, që ai e udhëhiqte. Ai më akuzonte me udhëtime për persona që unë nuk i njihja.Balla ka udhëtuar me trafikantë droge. Si ka mundësi që taksat e taksapaguesve shqiptarë nuk shkojnë për studentët, por shkojnë tek një person që nuk merr pjesë fare në tender. Mazhoranca nuk e heton. Dalin nëpër televizione dhe gënjejnë se ka një masë sigurie në gjykatë, ndërkohë që nuk ekziston. Beteja ligjore vijon”, tha ai.
Nga ana tij kreu i grupit parlamentar të PS, Taulant Balla i bëri thirrje Prokurorisë të vijojë hetimet dhe mos pushojë hetimet për çështjen CEZ. Balla tha dëshmitari kyç për këtë çështje, Nue Kalaj ndodhet në Kosovë ku kandidon për anëtar të këshillit komunal në Komunën e Prizrenit dhe Prokuroria të mos thotë se nuk e gjen se ku është ai.
“Unë i qëndroj akuzës së bërë, se qytetarët shqiptarë kanë humbur 419 mln euro nga privatizimi i OSSHE te CEZ. I bëj thirrje prokurorisë së Tiranës që mos përdorë makinacione për ta pushuar çështjen në ngarkim të Sali Berishës, Nue Kalajt, Shkëlzen Berishës. Prokuroria të vijojë hetimet dhe me shpresën e gjithë shqiptarëve që SPAK ngrihet së shpejti le të jetë kjo një prej dosjeve që t’i vihet në dispozicion SPAK. Është e turpshme që pas 18 muajsh që kur është bërë kallëzimi, nuk mund të na thotë prokuroria që nuk gjejmë dot Nue Nik Kalaj, i cili kandidon në Kosovë për anëtar të këshillit komunal në Prizren. Ne nuk jemi si ata, pasi çdo akuze dhe çështje i shkojmë deri në fund. Akuzat që kemi ngritur qëndrojnë plotësisht”- tha Balla.
