Përplasje të etheshme nga java e parë, derbi i madh i kryeqytetit në javën e gjashtë dhe start i përpjetë për Partizanin e Tiranën. Kjo është esenca e shortit për kalendarin e ri të Abissnet Superiore, që u hodh në ambientet e “Shtëpisë së Futbollit”. Në orën 11:00 u zbulua rrugëtimi i plotë i edicionit të 88-të të elitës së futbollit shqiptar, një kampionat që premton emocione të forta që nga dita e parë.
Edhe në këtë edicion, 10 skuadra do të garojnë për titullin kampion dhe mbijetesën. Një lajm i mirë për tifozët është rikthimi i emrave me peshë si Skënderbeu dhe Laçi në elitë. Ata bashkohen me Egnatian, AF Elbasanin, Vllazninë, Dinamo Sitin, Partizanin, Tiranën, Vorën dhe Teutën, duke formuar një panoramë të larmishme skuadrash me ambicie të ndryshme.
Si funksionon formati?
Kampionati i ri është planifikuar të nisë zyrtarisht më 22 gusht dhe të mbyllet më 9 maj, duke ofruar një sezon të gjatë dhe plot sfida. Një ndryshim thelbësor në formatin e këtij edicioni është ndarja e tij në dy faza kryesore pas përfundimit të 27 javëve të para, ku pikët do të përgjysmohen.
Gjashtë ekipet e renditura në krye do të formojnë grupin “play off”, ku do të luftojnë për titullin kampion. Kjo fazë do të përbëhet nga 10 javë, me sfida vajtje-ardhje, duke garantuar duele të nxehta deri në fund. Ndërkohë, katër skuadrat e tjera do të marrin pjesë në fazën “play out”, me objektivin e vetëm për të siguruar mbijetesën në kategori. Për ta, do të luhen tre faza, me sfida vajtje-ardhje-vajtje, që do të sjellin një total prej 9 javësh vendimtare. Vetëm vendi i dhjetë do të bjerë direkt nga kategoria, ndërsa ekipi i renditur në vendin e nëntë do të ketë një shans të fundit në finalen e “play out” kundër një ekipi nga Kategoria e Parë.
Stadiumet ende një problem
Në lidhje me infrastrukturën, dy nga klubet kryesore të kryeqytetit, Tirana dhe Partizani, do të vazhdojnë të përdorin stadiumin modern “Air Albania”. Gjithashtu, Dinamo do të ketë në dispozicion stadiumin “Elbasan Arena”, të cilin do ta ndajë me ekipin e AF Elbasanit. Këto janë skuadrat e vetme që ndajnë fusha së bashku, edhe pse Tirana ka në fakt edhe Selman Stërmasin në dispozicion.
Kalendari i Abissnet Superiore
Shorti ka nxjerrë edhe kalendarin e detajuar të javëve të para, duke sjellë përballje interesante që në nisje të kampionatit. Partizani ka startin më të komplikuar, duke qenë i detyruar të përballet në katër javët e para me Teutën ambicjoze, Vllazninë e Dinamon, me vetëm Laçin midis që mund të quhet i thjeshtë në letër, por tepër i vështirë në historinë mes klubeve. Tirana gjithashtu e nis të përpjetë rrugëtimin e saj me Egnatian e Teutën dy kundërshtarët e parë.
Derbi i madh i kryeqytetit, si gjithnjë, rezervohet në javën e gjashtë të kampionatit, ndërsa Tirana, ndryshe nga të kuqtë që përballen me Dinamon në javën e katërt, do të luajë derbin e dytë të kryeqytetit në javën e nëntë.
Java 1:
Partizani – Teuta
Laçi – Elbasani
Vllaznia – Skënderbeu
Dinamo – Vora
Egnatia – Tirana
Java 2:
Teuta – Tirana
Vora – Egnatia
Skënderbeu – Dinamo
Elbasani – Vllaznia
Partizani – Laçi
Java 3:
Laçi – Teuta
Vllaznia – Partizani
Dinamo – Elbasani
Egnatia – Skënderbeu
Tirana – Vora
Java 4:
Teuta – Vora
Skënderbeu – Tirana
Elbasani – Egnatia
Partizani – Dinamo
Laçi – Vllaznia
Java 5:
Vllaznia – Teuta
Dinamo – Laçi
Egnatia – Partizani
Tirana – Elbasani
Vora – Skënderbeu
Java 6:
Teuta – Skënderbeu
Elbasani – Vora
Partizani – Tirana
Laçi – Egnatia
Vllaznia – Dinamo
Java 7:
Dinamo – Teuta
Egnatia – Vllaznia
Tirana – Laçi
Vora – Partizani
Skënderbeu – Elbasani
Java 8:
Teuta – Elbasani
Partizani – Skënderbeu
Laçi – Vora
Vllaznia – Tirana
Dinamo – Egnatia
Java 9:
Egnatia – Teuta
Tirana – Dinamo
Vora – Vllaznia
Skënderbeu – Laçi
Elbasani – Partizani
Me shortin e përfunduar, skuadrat tashmë dinë rrugëtimin e tyre dhe përgatitjet mund të intensifikohen. Kampionati i ri i Abissnet Superiore premton një spektakël të vërtetë futbolli, me rivalitet të fortë dhe emocione të papërshkrueshme deri në ndeshjen e fundit.
