Kur mundet, qëndron larg vëmendjes (për një periudhë kishte hequr madje edhe rrjetet sociale), por Isabel Haugseng Johansen është gjithmonë e pranishme në jetën e të dashurit të saj Erling Haaland, edhe në Botëror ku vikingu po e udhëheq Norvegjinë me gola. Një histori e lindur në Bryne, qyteti ku të dy u rritën dhe ku të dy luanin futboll. E nisën te Bryne KF dhe, edhe kur Haaland mori hov në karrierë, të dy mbetën në kontakt dhe u lidhën në vitin 2021: “Në fillim njihja vetëm shokun e tij më të mirë. Ai më pëlqente, por kur pashë Erlingun ndryshova mendje. Vërtet besoj se ishte fati”, ka treguar Isabel. “Ishte ajo që bëri hapin e parë me mua, jo e kundërta”, shtoi Haaland.
E lindur në vitin 2004, Isabel Haugseng Johansen luante në krahun e majtë (“si Ryan Giggs”, bën shaka Haaland) dhe kishte debutuar edhe me ekipin e parë të përfaqësueses së dytë të Bryne KF/Frøyland. “Kisha pak fuqi në këmbën e majtë, isha e shpejtë dhe pika ime e fortë ishte vrapimi, edhe pse nuk isha shumë e zonja në mbajtjen e topit”, ka rrëfyer ajo.
Pas një periudhe pa rrjete sociale, Johansen u rikthye në internet për të folur kryesisht për ushqimin, pasionin e saj. Nuk është rastësi që ish-futbollistja është shumë e pranishme edhe në zgjedhjet e Erling Haalandit, i cili, siç dihet, ndjek një dietë shumë të veçantë me mbi 6000 kalori: “Kur jemi në shtëpi gatuajmë bashkë; disa gjëra i bën ai dhe disa të tjera unë”, ka treguar ajo. Pikërisht Isabel shpjegon se sa i kujdesshëm është Haaland me dietën: “Mendon shumë për atë që fut në trupin e tij. Na pëlqen të gatuajmë së bashku. Ai ha jashtëzakonisht shumë; është gjithmonë ‘kur do të hamë herën tjetër?’ ose ‘çfarë do të përgatisim?’”. Fiksimi i Haalandit me ushqimin e përfshiu në fund edhe atë: “Nisa të mendoj edhe unë për këtë dhe të studioj ushqimin, duke provuar të gatuaj darka të shëndetshme që të mos dukeshin ‘tepër’ të shëndetshme”, por të ishin edhe të bukura për t’u parë”.
Sa i përket jetës së tyre private, Erling dhe Isabel janë shumë të rezervuar, edhe më tepër që kur në vitin 2024 lindi fëmija i tyre i parë, i cili pothuajse nuk shfaqet në asnjë prej fotove të çiftit. Edhe kur Haaland publikoi mini-dokumentarin “Day in the Life of a Pro Footballer”, kushtuar një dite tipike të tij, vendimi i përbashkët i çiftit ishte ta përjashtonin plotësisht djalin nga xhirimet.
