Qindra shqiptarë janë mbledhur në Hagë, pranë Dhomave të Specializuara të Kosovës, në mbështetje të ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi. Pak para nisjes së seancës ka patur tensione mes palës shqiptare dhe policisë holandeze. Policia holandeze u kërkoi disa herë protestuesve të largoheshin nga hyrja e gjykatës dhe të zhvendoseshin në zonën e autorizuar për protestë. Efektivët paralajmëruan se, nëse urdhri nuk zbatohej, do të ndërhynin për largimin e tyre.
Kjo solli përplasje verbale me disa prej protestuesve. Pas paralajmërimeve të përsëritura të policisë, situata u qetësua dhe protestuesit ndalën thirrjet ndaj efektivëve. Tubimi zhvillohet në ditën kur Dhomat e Specializuara pritet të shpallin aktgjykimin e shkallës së parë ndaj katër ish-drejtuesve të UÇK-së. Seanca për shpalljen e vendimit është caktuar për sot në orën 10:00.
