Në prag të Real Madrid–Inter, ndeshjes shumë të pritur të javës së parë të fazës së ligës së Champions League, në konferencën për shtyp, së bashku me teknikun José Mourinho, foli edhe Kylian Mbappé. Biseda me gazetarët pati edhe një moment të veçantë, kur sulmuesi francez, me një gjest të shpejtë, fshehu nga pamja një shishe Gatorade që ishte vendosur dukshëm përpara tij mbi tavolinë.
Mbappé e bëri këtë dy herë, pasi një dorë vendosi një tjetër shishe në të njëjtin pozicion pas “largimit” të parë që kishte bërë ish-lojtari i PSG-së.
Gjesti i Mbappes: Gatorade jashtë tavolinës.
Gjesti në fjalë solli menjëherë në kujtesë një veprim të ngjashëm të bërë nga Cristiano Ronaldo pesë vjet më parë, para ndeshjes Portugali–Hungari në Kampionatin Europian. Sapo u ul pranë trajnerit të tij, sulmuesi portugez hoqi nga tavolina dy shishe Coca-Cola, sponsor zyrtar i turneut, dhe në vend të tyre vendosi një shishe të mbushur me ujë. “Ujë! Ja çfarë duhet të pini… ujë!”, shtoi Ronaldo, vëmendja maniakale e të cilit ndaj ushqyerjes – dhe shmangia e pijeve të gazuara dhe me sheqer – është e njohur prej kohësh.
Mbappé u kufizua vetëm te gjesti dhe, në rastin e tij, nuk pati asnjë predikim për një mënyrë jetese të shëndetshme. Shpjegimi për sjelljen e francezit 27-vjeçar është më tepër i natyrës komerciale. Kylian ka pasur gjithmonë një politikë të hekurt për mbrojtjen e imazhit të tij: nuk pranon të jetë imazh reklamues – madje as një “sfond” pasiv reklamash – për markat që sponsorizojnë kompeticionet, por që nuk kanë një kontratë të drejtpërdrejtë sponsorizimi me të.
Ky është pikërisht rasti i Gatorade, në pronësi të PepsiCo, e cila prej vitesh është partnere zyrtare e Champions League të UEFA-s dhe për këtë arsye shishet e saj përfundojnë në mënyrë të pashmangshme në tavolinat e konferencave për shtyp.
Ka edhe një precedent që shkaktoi shumë bujë: në vitin 2022, Mbappé mungoi në sesionet fotografike të Francës me Coca-Cola, KFC dhe Betclic, pasi nuk dëshironte të përdorej nga sponsorët e kombëtares franceze, të cilët nuk ishin sponsorë të tij. Një mungesë që binte ndesh me marrëveshjen me “Les Bleus”, e cila detyron çdo lojtar të marrë pjesë në fushatat e marketingut me partnerët e kombëtares, në këmbim të 25 mijë eurove për ndeshje.
Arsyeja e bërë publike në atë kohë nga rrethi i Mbappes ishte se jo të gjitha markat përputheshin me vlerat e tij dhe se, për më tepër, të ardhurat e krijuara nga këto kontrata nuk riinvestoheshin sa duhej në futbollin bazë.
Pse e bëri dhe çfarë rrezikon
Këtë herë ekziston edhe një element tjetër që e bëri “automatike” reagimin e neverisë së Mbappes ndaj Gatorade: sulmuesi i Real Madridit ka një kontratë me një pije sportive rivale të markës Pepsi. Nuk bëhet fjalë për një marrëveshje në tregun perëndimor: që prej prillit të këtij viti, Kylian sponsorizon “Bushuila”, një pije e njohur sportive dhe elektrolitike e prodhuar nga Dongpeng Beverage, një gjigant kinez i këtij sektori.
Të vendosësh Gatorade në plan të parë përpara tij gjatë konferencës së Champions League do të thotë t’i bësh reklamë falas një konkurrenti, duke e lidhur atë edhe me imazhin e tij. Kylian vendosi të mos e lejojë këtë. Formalisht, Mbappé nuk do të mund të sillej në këtë mënyrë, pasi direktivat komerciale të UEFA-s kërkojnë praninë e produkteve të sponsorëve zyrtarë në tavolinat e konferencave dhe heqja e tyre përbën shkelje që mund të sjellë sanksione financiare ndaj klubit.
Praktikisht, megjithatë, ai e bën këtë, duke marrë përsipër një rrezik të llogaritur: gjoba e mundshme ndaj klubit është e papërfillshme në krahasim me penalitetet shumë të larta dhe dëmin ndaj imazhit që sportisti do të rrezikonte nëse do të shkelte klauzolat e ekskluzivitetit të kontratave të tij të majme të sponsorizimit personal.
