Helmoi për vdekje shokun e skuadrës, arrestohet futbollisti: zbulimi pas një viti

Një histori kriminale e ndërthurur me futbollin ka tronditur Gjermaninë: një futbollist është arrestuar nën akuzën se ka helmuar për vdekje një shok të skuadrës gjatë udhëtimit tradicional të ekipit në fund të sezonit. Kthesa në këtë çështje erdhi pas një viti hetimesh: fillimisht dyshohej për një helmim ushqimor.

Vdekja nga helmimi i futbollistit të TuS 1912 Rockenberg vitin e kaluar

Në mesin e qershorit të vitit 2025, TuS 1912 Rockenberg, një klub amator i Kreisliga, niveli i tetë i futbollit gjerman, organizoi një udhëtim të skuadrës në Dresden. Mes pjesëmarrësve ishin viktima dhe i dyshuari për vrasjen e tij. Gjatë udhëtimit dhe menjëherë pas kthimit në shtëpi, i pari pësoi një gjendje të rëndë dhe të papritur shëndetësore.

Familja telefonoi shërbimet e emergjencës, por përkeqësimi i gjendjes ishte i pakthyeshëm: lojtari vdiq në spital po atë ditë, më 16 qershor 2025. Fillimisht, shokët e skuadrës dhe familjarët dyshuan për një helmim ushqimor, ndoshta të shkaktuar nga peshku që skuadra kishte konsumuar gjatë udhëtimit.

Por autopsia dhe analizat toksikologjike të Institutit të Mjekësisë Ligjore në Giessen përcaktuan shkakun e vërtetë të vdekjes: insuficiencë multiorganike septike si pasojë e helmimit. Lloji i helmit, mënyra e saktë e përdorimit të tij dhe detaje të tjera teknike nuk janë bërë publike “për arsye të taktikës hetimore”, pasi ishin gjëra që vetëm autori mund t’i dinte.

Arrestohet një shok skuadre, nën akuzën se e helmoi

Hetimet zgjatën për muaj të tërë dhe më 1 shtator të këtij viti çuan në arrestimin e të dyshuarit. Pasi u paraqit para gjyqtarit, ai u vendos në paraburgim, pa dhënë deklarata, siç është e drejta e tij. U kontrolluan banesa dhe vendi i tij i punës, bashkia e qytetit të Niddatalit, si dhe u sekuestruan telefona celularë, kompjuterë dhe pajisje të tjera.

Akuza ndaj tij është jashtëzakonisht e rëndë: vrasje e paramenduar për motive të ulëta. Prokurori i Përgjithshëm Thomas Hauburger tha se, në gjendjen aktuale të hetimeve, gjithçka të çon drejt një akti hakmarrjeje personale. Ajo që ai nuk shtoi është se, sipas dëshmive në Rockenberg, dy futbollistët dyshohet se ishin grindur për shkak të një gruaje. Në rast dënimi për vrasje, në Gjermani mund të jepet edhe burgim i përjetshëm.

Për dy futbollistët nuk janë bërë publike mbiemrat, por vetëm emrat dhe moshat. Viktima është Philipp L., i cili vdiq pak ditë para se të mbushte 31 vjeç. Në atë kohë, klubi e kujtoi si “mik, luftëtar në fushë dhe njeri me zemër të madhe”, i cili kishte lënë pas “një boshllëk të pazëvendësueshëm”.

I dyshuari është identifikuar si Marius W., 35 vjeç. Edhe për këtë të fundit qarkullon fotografia, ashtu si edhe të dhënat e plota: ishte qartësisht e pamundur që të dy të mbeteshin të panjohur.

I dyshuari për vrasjen do të duhej të organizonte pas pak ditësh një festë të madhe martese, pasi ishte martuar tashmë me një ceremoni civile vitin e kaluar, pas ngjarjeve për të cilat akuzohet. Natyrisht, tashmë gjithçka ka kaluar në plan të dytë përballë zhvillimeve tronditëse të kësaj historie.

Pas arrestimit të Mariusit, TuS Rockenberg publikoi një deklaratë, ku shprehu të gjithë tronditjen e tij: “Pasi vitin e kaluar u detyruam të përballeshim me vdekjen e papritur të një prej shokëve tanë të skuadrës, ngjarjet na lënë sërish pa fjalë. Për momentin, askush prej nesh nuk është në gjendje ta kuptojë këtë goditje të mëtejshme dhe të rëndë.

Tani vendosim shpresat tona te puna e autoriteteve dhe besojmë në një sqarim të plotë të asaj që ka ndodhur. Për shkak të situatës emocionalisht dhe jashtëzakonisht të rënduar për të gjithë anëtarët e shoqatës sonë, nuk do të bëjmë asnjë deklaratë mbi hetimet në vazhdim.

Prandaj ju kërkojmë me këmbëngulje dhe mirësjellje të përmbaheni nga drejtimi i kërkesave apo pyetjeve ndaj lojtarëve, trajnerëve dhe drejtuesve. Ju falënderojmë shumë për mirëkuptimin”.