Misteri rreth aktorit që do të marrë përsipër rolin e James Bond mund të jetë më pranë fundit sesa mendohej.
Steven Knight, skenaristi i filmit të ri të sagës së famshme, duket se ka lënë të kuptohet se aktori që do të pasojë Daniel Craig në rolin e agjentit 007 mund të jetë tashmë i përzgjedhur.
Gjatë një interviste në programin “Today” të BBC Radio 4, Knight u pyet nëse e kishte shkruar skenarin duke pasur në mendje aktorin e zgjedhur apo në bazë të asaj që dinte për personazhin.
“Pak nga të dyja”, u përgjigj ai.
Kjo deklaratë është interpretuar si një sinjal se producentët mund ta kenë marrë tashmë vendimin për aktorin që do të luajë James Bond-in e ardhshëm.
Knight shtoi se “e bën jetën pak më të lehtë nëse e di se kush është ai person”, por theksoi se shkrimtari duhet të ndërtojë personazhin dhe jo ta përshtatë atë vetëm për aktorin.
“Duhet të shkruash personazhin, jo aktorin”, tha ai.
Skenaristi i “Peaky Blinders” foli gjithashtu për rëndësinë e të shkruarit për një prej ekskluziviteteve më ikonike të kinemasë.
“James Bond është një univers dhe një ekskluzivitet më vete, ndaj ka disa rregulla. Sigurisht, duhet ta çosh përpara, por më pëlqen vendi ku qëndron”, u shpreh Knight.
Ai shtoi se e vlerëson faktin që Bond është një personazh britanik dhe se nuk i përket universit të superheronjve të DC apo Marvel.
“Ndjej sikur po bëj detyrën time për Mbretin dhe vendin”, tha ai.
Daniel Craig i dha lamtumirën rolit të 007 në vitin 2021, me filmin “No Time to Die”, dhe që prej atëherë fansat kanë spekuluar vazhdimisht se kush do të jetë pasardhësi i tij.
Mes emrave më të përfolur është aktori Jack Lowden, i njohur për rolin e tij në serialin “Slow Horses”.
