Mbi 120 mijë të rinj dolën në rrugët e më shumë se 30 qyteteve të Gjermanisë, në kuadër të protestave të organizuara nën sloganin “Gen Z regelt” (Gjenerata Z i merr gjërat në dorë).
Protestat nisën në mënyrë paqësore, me kërkesa për më shumë investime në arsim, drejtësi sociale, luftë kundër racizmit dhe kundërshtim të masave shtrënguese. Megjithatë, situata u tensionua gjatë mbrëmjes, veçanërisht në Frankfurt dhe Këln, ku u regjistruan përplasje, vandalizëm dhe arrestime.
Incidente të rënda në Frankfurt, mbi 50 arrestime
Incidentet më serioze u shënuan në Frankfurt, ku sipas vlerësimeve fillestare të autoriteteve, më shumë se 1,000 persona u përfshinë në trazira.
Grupe personash të maskuar sulmuan policinë, thyen vitrinat e dyqaneve dhe kryen akte vandalizmi e plaçkitjeje në qendër të qytetit. Në shënjestër ishte edhe një dyqan armësh, nga ku u vodhën disa sende.
Policia ndërhyri me forca të shumta, përfshirë njësi speciale dhe automjete me topa uji. Si pasojë e incidenteve, u kryen më shumë se 50 arrestime.
Trazira u raportuan edhe në Këln dhe Berlin, ku pati hedhje shishesh dhe fishekzjarrësh, përleshje me policinë dhe arrestime të tjera.
Sipas autoriteteve, në aktet e dhunës u përfshinë kryesisht grupe ekstremiste, të cilat dyshohet se u infiltruan në protestat që fillimisht ishin paqësore.
Si u organizuan protestat?
Lëvizja “Gen Z regelt” u organizua kryesisht përmes rrjeteve sociale, përfshirë TikTok, Instagram dhe Telegram.
Struktura organizative e saj mbetet e paqartë, ndërsa sipas raportimeve, koordinimi është bërë nga një grup i vogël personash anonimë.
Organizatorët kanë theksuar se dhuna nuk ishte pjesë e qëllimeve të protestës dhe kanë dënuar incidentet e regjistruara në disa qytete.
Reagimet politike
Ngjarjet kanë nxitur reagime edhe në skenën politike gjermane.
Ministri i Brendshëm, Alexander Dobrindt, dënoi aktet e dhunës dhe vlerësoi ndërhyrjen e policisë. Ndërkohë, ministrja e Arsimit, Karin Prien, pranoi rëndësinë e shqetësimeve dhe kërkesave të të rinjve.
Socialdemokratët dhe të Gjelbrit kërkuan që problemet e ngritura nga protestuesit të merren seriozisht, duke dënuar njëkohësisht dhunën.
Edhe kryeministri i landit të Hessenit, Boris Rhein, paralajmëroi se aktet e dhunshme nuk do të mbeten pa pasoja.
Protestat pritet të vazhdojnë
Pavarësisht incidenteve, lëvizja e Gjeneratës Z ka paralajmëruar aktivitete të tjera në ditët në vijim.
Nga 2 deri më 6 nëntor janë planifikuar aksione në shkolla dhe universitete, ndërsa më 20 nëntor të rinjtë pritet t’i bashkohen mobilizimit ndërkombëtar të grevës studentore.
Kërkesat kryesore të lëvizjes mbeten përmirësimi i arsimit, drejtësia sociale dhe lufta kundër diskriminimit.
