Paraqitja zhgënjyese e Interit në derbi pati një vazhdim edhe gjatë natës, me një protestë të Curva Nord ndaj skuadrës, e cila në fushë u shfaq pa grintë, bindje, zemërim dhe përqendrim. Për më tepër, lojtarët u drejtuan menjëherë drejt tunelit të dhomave të zhveshjes pas vërshëllimës përfundimtare, pa i përshëndetur dhe pa u kërkuar falje tifozëve që kishin tentuar t'i mbështesnin deri në momentin e fundit. Ky ishte mesazhi i vendosur gjatë natës në banderolën e Curva Nord, me një kritikë shumë të ashpër drejtuar futbollistëve zikaltër: “Një derbi i humbur pa luajtur. Nuk patët as guximin të përshëndesnit”.
Milan fitoi derbin 3-1 ndaj Interit, duke e vendosur ndeshjen brenda dhjetë minutave. Këtë herë, skuadra e teknikut Chivu nuk pati forcën për të realizuar përmbysjen. Mund ta ëndërronte vetëm, si një ide të çmendur që i kaloi në mendje kur Bastoni ngushtoi diferencën në mesin e pjesës së parë. Por gjithçka rezultoi një iluzion, në një mbrëmje që kishte nisur në mënyrën më të keqe të mundshme, me Pulisic dhe Rabiot që e ndëshkuan dy herë Interin brenda 10 minutave. Situata u përkeqësua plotësisht kur Moreira i kërkoi Modricit lejen për të ekzekutuar një goditje dënimi pranë zonës.
“Vazhdo, mund ta gjuash”, i tha kroati. Shpërthimi i tifozëve kuqezi në San Siro shoqëroi një gol të mrekullueshëm nga goditja e dënimit. Gjithçka shkoi sipas dëshirës së Amorim, i cili kështu mori hakun për humbjen e rëndë ndaj Bolognas. Për Chivu, përkundrazi, gjithçka shkoi keq. Plani për ta përballuar sfidën me Thuramin si sulmues të vetëm dështoi që në fillim. Ndërkohë, sot Lazio mund të ngjitet e vetme në krye të kampionatit, nëse arrin të mposhtë Cagliarin në shtëpi.
