Fansat e Ed Sheeran po kërkojnë rimbursimin e biletave të koncerteve të tij, pasi reperi Macklemore u largua nga turneu “The Loop” pas deklaratave të tij në mbështetje të Palestinës.
Vendimi ka shkaktuar reagime të shumta në rrjetet sociale, ndërsa disa artistë të tjerë kanë vendosur të tërhiqen nga turneu në shenjë solidariteti me reperin.
Gjithçka nisi pasi Macklemore, 43 vjeç, bëri thirrje për “Liri për Palestinën” gjatë një koncerti në stadiumin MetLife, në New Jersey. Gjatë performancës, ai shprehu mbështetjen për palestinezët dhe interpretoi këngën e tij protestuese “Hind’s Hall”, e cila trajton luftën në Gaza.
Pas këtyre deklaratave, disa stadiume ku ishin planifikuar koncertet e ardhshme njoftuan organizatorët se nuk do të lejonin që reperi të performonte në ambientet e tyre. Për këtë arsye, kompania organizatore e turneut vendosi që Macklemore të mos merrte pjesë në koncertet e mbetura.
Vendimi shkaktoi pakënaqësi te fansat e Ed Sheeran, të cilët kishin blerë biletat kur Macklemore ishte pjesë e programit.
“Përshëndetje, Ticketmaster! Ne i kemi blerë biletat kur Macklemore ishte në listën e artistëve. Tani që ai nuk do të jetë më pjesë e turneut, kërkojmë anulimin e biletave dhe rimbursimin e plotë”, shkroi një përdorues në rrjetin social X, duke iu drejtuar kompanisë së shitjes së biletave.
Të tjerë kërkuan që fansat të mos merrnin pjesë në koncerte, duke argumentuar se vendet bosh do të kishin ndikim më të madh te të ardhurat e turneut sesa rishitja e biletave.
Polemikat nuk u kufizuan vetëm te reagimet e publikut. Disa prej artistëve që do të performonin para Ed Sheeran vendosën të tërhiqeshin nga turneu në shenjë solidariteti me Macklemore.
Mes tyre ishin Finneas, Lukas Graham, Aaron Rowe dhe grupi Beoga, i cili shoqëron Sheeran gjatë performancave të tij.
Finneas, vëllai dhe bashkëpunëtori muzikor i Billie Eilish, deklaroi në rrjetet sociale se artistët nuk duhet të heshtin kur flasin në mbështetje të njerëzve që vuajnë.
Edhe grupi danez Lukas Graham reagoi ndaj situatës, duke theksuar se artistët duhet të kenë të drejtën të flasin për luftën, civilët e vrarë dhe fëmijët që meritojnë të rriten në paqe.
Pas kritikave, Ed Sheeran reagoi publikisht duke sqaruar se vendimi për largimin e Macklemore nuk ishte marrë prej tij, por nga kompania organizatore e turneut.
Këngëtari shpjegoi se disa prej ambienteve ku ishin planifikuar koncertet e ardhshme kishin paralajmëruar se shfaqjet nuk do të zhvilloheshin nëse reperi do të mbetej pjesë e programit.
Sheeran tha se kishte bërë përpjekje për të gjetur një zgjidhje që do të kënaqte të gjitha palët, por pa sukses. Ai theksoi gjithashtu se nuk dëshironte të zhgënjente fansat që kishin planifikuar të merrnin pjesë në koncerte dhe as të rrezikonte punën e ekipit që e shoqëron gjatë turneut.
Nga ana tjetër, Macklemore pretendoi se Sheeran dhe ekipi i tij kishin vendosur ta largonin nga turneu pas një mosmarrëveshjeje mes tyre. Reperi tha se e konsideronte këngëtarin britanik si një vëlla, por se të dy kishin qëndrime thelbësisht të ndryshme për këtë çështje.
