Bashkëthemeluesi i Microsoft, Bill Gates, ka paralajmëruar se asnjë qeveri në botë nuk është realisht e përgatitur për ndryshimet që Inteligjenca Artificiale do të sjellë në shoqëri.
Në një intervistë për Reuters, Gates tha se qeveritë kanë mbetur prapa përballë zhvillimit të teknologjisë dhe paralajmëroi për ndikimin e AI në tregun e punës, rrezikun e sulmeve të mundshme dhe varësinë nga “shoqëruesit” digjitalë.
“Asnjë qeveri nuk po merret me këtë në masën që duhet”, deklaroi Gates.
Megjithatë, ai theksoi se Inteligjenca Artificiale mund të ketë një ndikim të jashtëzakonshëm pozitiv, veçanërisht në vendet e varfra, nëse teknologjia përdoret siç duhet dhe qasja ndaj saj është e barabartë.
1 miliard dollarë për Inteligjencën Artificiale
Fondacioni Gates ka njoftuar se planifikon të investojë të paktën 1 miliard dollarë gjatë dy viteve të ardhshme për të zgjeruar aksesin në Inteligjencën Artificiale.
Fondet do të orientohen drejt projekteve në shëndetësi, arsim dhe bujqësi, ndërsa një tjetër synim është krijimi i bazave të të dhënave që do të mundësojnë përdorimin e modeleve të mëdha gjuhësore në të gjitha gjuhët.
Gates vlerësoi veçanërisht potencialin e AI në shëndetësi, nga mbështetja e mjekëve dhe punonjësve shëndetësorë deri te zbulimi i ilaçeve dhe vaksinave të reja.
Megjithatë, ai kërkoi bashkëpunim më të madh ndërkombëtar për të shmangur rreziqet. Gates e krahasoi zhvillimin e AI me skenarët e filmave ku një kërcënim i jashtëzakonshëm detyron vendet rivale të bashkohen.
