Banorët e Rrjollit kanë hyrë sot në ditën e gjashtë të protestës kundër ndërtimit të një resorti turistik në zonë. Situata është tensionuar, pasi protestuesit zbritën në kantierin e ndërtimit, ku mjetet e rënda të kompanisë “Gener 2” po punojnë për ngritjen e resortit “Blu Borgo” në vijën bregdetare. Banorët e konsiderojnë projektin si grabitje të pronave të tyre. Ata paralajmërojnë se nuk do të tërhiqen. Ata shprehen se disponojnë dokumentacion të rregullt pronësie për rreth 400 dynym tokë, të mbështetur nga një vendim gjykate i vitit 2006 dhe nga një ligj i miratuar në vitin 2008.
Një përfaqësues i banorëve deklaroi se protestat do të vijojnë dhe se lëvizja po merr përmasa më të mëdha. Banorët i kanë bërë thirrje institucioneve shtetërore që të shqyrtojnë dokumentet e pronësisë dhe të ndërhyjnë për ndalimin e punimeve. Ata kanë kërkuar gjithashtu reagim nga SPAK. Banorët, prej muajsh, kanë depozituar ankesa dhe se janë thirrur disa herë për sqarime. Sipas protestuesve, nëse nuk do të ketë reagim institucional, ata paralajmërojnë përshkallëzim të protestave, përfshirë bllokime dhe tubime më të gjera në ditët në vijim, si në Shkodër ashtu edhe në Tiranë.
