Ishte “e enjtja e madhe” e vezëve të Pashkës që këtë vit do të bëjë bashkë të dielën katolikët dhe ortodoksët, por mediat u pushtuan nga lajmet “e zeza”.
Fillimisht në atentat i mirëmenduar i mori jetën një 67-vjeçari në fshatin Pllanë të Lezhës rreth orës 20.00. Viktima është një 64-vjeçar, i identifikuar si Gjovalin Prendi. Ngjarja ndodhi në lokalin e viktimës.
Sipas burimeve në vendin e ngjarjes, autori zbriti nga një automjet tip “Range Rover” dhe hapi zjarr me breshëri kallashnikovi në drejtim të lokalit duke lënë të vdekur në vend 64-vjeçarin që ndodhej i ulur në një tavolinë duke konsumuar një kafe.
[video width="640" height="360" mp4="https://cdnimpuls.com/lapsi.al/wp-content/uploads/2025/04/ok.mp4"][/video]
Ai ndërroi jetë gjatë transportimit në Spitalin Rajonal të Lezhës. Prendit i është bërë atentat në të njëjtin lokal edhe në vitin 2020, por mundi t’u shpëtojë plumbave.
Duket se vrasja e së enjtes pason një zinxhir vrasjesh. Viktima është babai i Roan Brahimit i njohur edhe si Sidorel Prendi, i ekzekutuar më 9 maj 2024 në Athinë. Ai u qëllua nga persona që lëviznin me një motor në sy të gruas dhe fëmijëve të tij sapo ishte kthyer nga Dubai.
Roan Brahimi ka qenë i dyshuar për lidhje në vrasjen e Gentjan Bejtjes në 15 mars të këtij viti në Larushk të Krujës. Një nga personat e arrestuar nga policia si transportues i vrasësve është Ilir Beqaraj që rezulton të jetë kunati i Roan Brahimit.
Brahimi njihej edhe si “armiku” i Ervis Martinajt. Ai u shpall në kërkim për t’u marrë në pyetje pas vrasjes se Brilant Martinajt në 17 korrik 2022 ku humbën jetën edhe dy persona të tjerë, por nuk u gjet.
4 të plagosur në Tiranë
Nuk zgjati dhe ishte radha e Tiranës të merrte radhën e vrasjeve. Rreth orës 22.00, në spitalin e Traumës, kanë shkuar të plagosur me armë Arenc Stafa, 34 vjeç, Kjan Mullai, 19 vjeç, dhe dy të mitur, D.D 11 vjeç dhe M.D. 17 vjeç.
Burime nga spitali thanë se 3 nga të plagosurit janë jashtë rrezikut për jetën ndërsa 11-vjeçari është në gjendje më të rëndë.
Sipas burimeve nga vendi i ngjarjes disa persona në makinë kanë qëlluar në drejtim të një automjeti tjetër Benz G-Class që i përket një kompanie security. Mediat raportuan se të plagosurit janë ndjekur nga autorët nga rrethrrotullimi i Shkozës deri në Lundër. Si në shumë atentate autorët kanë djegur makinën dhe kanë humbur gjurmët. ©LAPSI.al
