Java e 26-të e La Ligës solli një surprizë të madhe me humbjen e Real Madrid në Sevilje. Betis i drejtuar nga Manuel Pellegrini triumfoi 2-1 ndaj “Los Blancos”, duke i dhënë mundësinë Atletico Madrid të parakalojë skuadrën e teknikut Ancelotti në renditje, nëse fiton ndaj Bilbaos. Protagonisti kryesor i sfidës ishte Isco, ish-lojtari i Realit, i cili fillimisht asistoi për golin e barazimit të Kartozos dhe më pas shënoi me penallti golin vendimtar.
Betis 2-1 Real Madrid
Pas fitores 2-0 ndaj Gironës, Real mbërriti në stadiumin “Benito Villamarín” me objektivin për t’u shkëputur në krye të tabelës dhe për të vënë nën presion Barcelonën, e cila luan ndaj Real Sociedad. Ancelotti hodhi në fushë treshen sulmuese Vini Jr., Mbappe dhe Rodrygo, por sërish nuk kishte në dispozicion Bellingham të pezulluar.
Megjithatë, avantazhi i madrilenëve erdhi nga një kombinim mes Mendy dhe Brahim Diaz, i cili shënoi në minutën e 10', pas një asisti të shkëlqyer të francezit. Por Betisi nuk u dorëzua dhe barazoi në minutën e 34-të me një goditje me kokë të Cardoso pas një krosimi perfekt nga Isco. Skuadrat shkuan në pushim në barazim 1-1, ndërsa Real mund të kishte pësuar edhe një tjetër gol, por Courtois ndali sërish Cardoso në kohën shtesë.
Lexo më tej: Dy euroderbi në 1/8 e Champions: Real përplaset me Atletico e Bayern me Leverkusen
Pjesa e dytë nisi me presion nga Betis, i cili përmbysi gjithçka në minutën e 54'. Rudiger shkaktoi një penallti ndaj Rodriguez dhe Isco e ktheu në gol duke i dhënë avantazhin vendasve. Betis dominoi vazhdimin e lojës, me Cucho Hernandez që i shkoi shumë pranë golit të tretë në minutën e 67'. Fitorja 2-1 e ngjit Betis në kuotën e 38 pikëve, duke regjistruar një tjetër triumf të madh pas atyre kundër Barcelonës dhe Atletiko Madridit. Nga ana tjetër, Real pëson një disfatë të rëndë në garën për titull, pasi mbetet me 54 pikë dhe rrezikon të shohë Barcelonën të shkëputet në +3.
Rayo Vallecano 1-1 Sevilla
Një sfidë e ekuilibruar u zhvillua në “Vallecas”, ku pjesa e parë u mbyll pa gola dhe me shumë pak raste të rrezikshme. Por gjithçka ndryshoi në pjesën e dytë, kur Ratiu shënoi për vendasit në minutën e 55'. Sevilla reagoi dhjetë minuta para fundit të ndeshjes me një gol të Lukebakio, ndërsa në minutën e 84', Lejeune iu afrua golit të fitores për Vallecano, por goditja e tij u ndal nga Nyland. Ndeshja u mbyll në barazim 1-1, me Rayo që shkon në 36 pikë dhe Sevilla në 33.
Girona 2-2 Celta Vigo
Në stadiumin “Montilivi”, Girona kaloi në avantazh në minutën e 21' me një gol të Tsygankov, pak sekonda pasi Romeu goditi shtyllën. Por Celta Vigo barazoi në minutën e 37' me një gol të Losada. Në fillim të pjesës së dytë, miqtë përmbysën gjithçka në minutën e 51', kur David Lopez shkaktoi një penallti dhe Marcos Alonso shënoi nga pika e bardhë. Megjithatë, Girona nuk u dorëzua dhe në minutën e 70', një goditje me kokë e Yangel Herrera i dha skuadrës vendase barazimin 2-2. Me këtë rezultat, Celta Vigo shkon në 33 pikë, ndërsa Girona në 32.
