Qindra doza kanabis gati për shitje u sekuestruan gjatë një operacioni të koduar "Start-Smart”, nga Sektori për Hetimin e Narkotikëve, në bashkëpunim me Drejtorinë e Forcës së Posaçme Operacionale në departamentin e policisë kriminale, në drejtimin e Prokurorisë së Lezhës.
Në kuadër të operacionit u arrestuan në flagrancë shtetasit:
Martin Përvathi, 29 vjeç dhe Amarildo Gjergji, 30 vjeç, banues në Lezhë, të dyshuar për veprën penale “Prodhimi dhe shitja e narkotikëve”, kryer në bashkëpunim.
Këta shtetas janë ndaluar nga shërbimet e Forcës së Posaçme Operacionale, ndërkohë që qarkullonin me automjet, në qytetin e Lezhës. Gjatë kontrollit të ushtruar në automjet, janë gjetur dhe sekuestruar në cilësinë e provës materiale, doza të lëndës së dyshuar narkotike kanabis.
Në vijim të veprimeve procedurale janë ushtruar kontrolle në banesën e shtetasit Martin Përvathi, ku u gjetën 323 doza kanabisi dhe në banesën e shtetasit Amarildo Gjergji, ku u gjetën 18 doza kanabisi, të cilat u sekuestruan në cilësinë e provës materiale.
Në vijim të operacionit, nisi procedimi në gjendje të lirë për veprën penale “Prodhimi dhe shitja e narkotikëve”, për shtetasit P. P., 60 vjeç (babai i shtetasit Martin Përvathi) dhe Amarildo Gjergji, 24 vjeçe (bashkëjetuesja e shtetasit Amarildo Gjergji).
Gjithashtu, nisi procedimi në gjendje të lirë për shtetasit:
A. Gj., 66 vjeç, për veprën penale “Prodhimi dhe mbajtja pa leje e armëve të gjuetisë dhe sportive”, pasi iu gjetën në banesë, një armë gjahu dhe municion luftarak, që i mbante pa leje;
D. F., 36 vjeç, për veprën penale “Pastrimi i produkteve të veprës penale ose veprimtarisë kriminale”, pasi iu gjetën në banesë, 5050 euro dhe 513 000 lekë të rinj.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
