Politika italiane ka "zier" ditët e fundit dhe tema e gjithë diskutimeve ka qenë emri i presidenti të ardhshëm të vendit. Por, me të gjitha gjasat, të mërkurën në orët e pasdites do të jetë sërish 80-vjeçari Sergio Mattarella që do të mbajë edhe për shtatë vite të tjera postin më të lartë, të paktën juridikisht, të institucioneve italiane. Partitë italiane, që fillimisht dukeshin të ndara mbi kandidatët për president, gjetën sot në mëngjesin e vonë një marrëveshje surprizë mbi emrin e presidentit, faktikisht i dashur nga opinioni publik përtej partive.
Vendimi i sotëm ishte rezultati i ekuilibrave tejet të brishta të politikës italiane, ku nuk ka një parti që dominon skenën, por një shumëllojshmëri forcash, nga Partia Demokratike e majtë tek 5 Yjet populistë dhe deri tek partitë e djathta si Lega dhe Fratelli d’Italia, pjesa më e madhe e të cilëve për më shumë ndodhen bashkë në një ekzekutiv të zhurmshëm ku kryeministri Mario Dragji duket i vetmi që ka një linjë të qartë qeverisjeje.
