Partia Demokratike ka reaguar në lidhje me shpërthimin me tritol që ndodhi në banesën e drejtuesit të selisë blu në Shijak. Partia Demokratike e ka konsideruar ngjarjen e rëndë si një akt kriminal të papranueshëm. Selia Blu bën thirrje për zbardhje urgjente të çështjes dhe të vihen para drejtësisë autorët. Kujtojmë që, lënda plasëse është vendosur në portën e banesës së shtetasit Ilgnor Vora. Bëhet me dije se nuk ka dëme në njerëz, por vetëm dëme materiale.
"Duke i shprehur të gjithë solidaritetin familjes Vora, ne e konsideruar këtë akt kriminal të papranueshëm, të rëndë dhe kërkojmë zbardhjen pa vonesa të kësaj ngjarje dhe vënien menjëherë përpara përgjegjësisë të autorëve. Ngjarje të rënda si kjo dhe aktet kriminale të kohëve të fundit, janë thirrje ulëritëse për organet ligjzbatuese për të vepruar me shpejtësi, profesionalizën dhe paanësi për mbrojtjen e rendit dhe sigurisë publike, si dhe jetës e pronës së qytetarëve", thuhet në deklaratën e PD-së.
Ngjarja ndodhi mbrëmë rreth orës 22:00, në lagjen “Kodra”, në Shijak.
