Partia Demokratike me anë të një reagimi për mediat i është kundërpërgjigjur kryeministrit Edi Rama për ngjarjen e rëndë të ndodhur në Kavajë ku mbeti i plagosur një anëtarë i PD-së në zyrat e kësaj partie. Më herët gjatë ditës së dotme, kreu i qeverisë Rama tha se autorët e plagosjes së aktivistit të PD, Bledar Okshtuni, nuk janë të Partisë Socialiste, por sipas tij janë militantë të PD.
Ndërkohë nga ana tjetër sipas PD, Rama merret me gënjeshtra dhe manipulime ndërkohë që dhunuesit nuk janë arrestuar akoma. Lidhur me këtë ngjarje, Partia Demokratike publikoi një foto, ku autorët e shpallur në kërkim për ngjarjen, Ndriçim Jonuzi (Tahiri), Dorian Troplini dhe Markel Shtylla, janë në një tryezë, duke ngrënë drekë, me kryebashkiakun e PS në Kavajë, Redian Krali. Ndër të tjera në reagimin e PD thuhet se ky është një sulm kriminal kundër demokracisë sonë nga një njeri që tashmë e di se do të humb zgjedhjet.
"Asnjë gënjeshtër nuk e ndihmon dot Ramën, sepse të gjitha faktet dëshmojnë se sulmuesit e djeshëm janë njerëzit e tij dhe kanë vepruar me qëllim. Ky është një sulm kriminal kundër demokracisë sonë nga një njeri që tashmë e di se do t’i humbe zgjedhjet. Të dielën ne do të fitojmë dhe do të sjellim ndryshimin, për të cilin Shqipëria ka nevojë!", thuhet në njoftim.
