Pasi shkoi në zyrën e Partisë Demokratike në Kavajë, pas ngjarjes së rëndë ku u përdorën dhe armët, presidenti Ilir Meta vizitoi rreth mesnatës të plagosurin Bledar Okshtuni në ambientet e spitalit. Kreu i Shtetit i bëri thirrje policisë dhe prokurorisë që ky krim zgjedhor të hetohet me shpejtësi dhe autorët të vendosen përpara drejtësisë.
“Nuk mund të mos vizitoja në spitalin e Durrësit aktivistin e Partisë Demokratike, z.Bledar Okshtuni, të plagosur me armë zjarri brenda në zyrën elektorale në Kavajë. I urova shërim sa më të shpejtë, si dhe i shpreha nënës dhe familjarëve të tij të gjithë solidaritetin dhe mbështetjen time. I falënderova mjekët e Durrësit për profesionalizmin, përkushtimin dhe humanizmin e dëshmuar, që Bledari të ketë tashmë një gjendje të stabilizuar, jashtë rrezikut për jetën.
U bëj thirrje Prokurorisë dhe Policisë, që ky krim i shëmtuar zgjedhor të hetohet me shpejtësi, si dhe autorët e urdhëruesit e këtij atentati të arrestohen pa vonesë dhe të dalin para drejtësisë.”, shkruan Meta.
