Siç u paralajmërua pak ditë më parë nga Komiteti Teknik i Ekspertëve, duke nisur nga kjo e enjte, i gjithë vendi do të nisë zbatimin e masave shtrënguese kundër pandemisë së koronavirusit. Prej mbrëmjes së sotme pas orës 20:30 nuk do të lejohet asnjë lëvizje e njerëzve apo mjeteve, përveç rasteve kur kanë marrë leje, si dhe do të mbyllen të gjitha bizneset. Ora policore do të jetë 20:30 deri në 06:00 të mëngjesit, ndërsa do të vijojë deri më 4 janar. Të gjithë ata persona apo biznese që thyejnë këtë masë kufizuese do të gjobiten sipas aktit normativ.
Gjithashtu nga sot mbyllen dhe shkollat 9-vjeçare dhe gjimnazet për pushimet e dimrit dhe do të rihapen më 11 janar. Vendimi u mor nga Komiteti Teknik i Ekspertëve, si një masë për të parandaluar grumbullimet për festat e fundviti, që mund të çonin në përhapjen më gjerë të virusit Covid-19.
