Sandër Lleshaj dha dorëheqjen pak ditë më parë nga posti i ministrit të Brendshëm, pas ngjarjes së rëndë ku një punonjës policie vrau 25-vjeçarin Klodian Rasha.
Sipas burimeve të Lapsi.al, mësohet se kryeministri Edi Rama do të emërojë në pozicionin e ministres së Brendshme, Elira Kokonën, e cila shërben aktualisht si Drejtore e zyres Juridike te kryeministrit dhe ka qene me pare Sekretare e Përgjithshme në Ministrinë e Drejtësisë dhe ate te Kultures.
Disa nga emrat e tjerë që kanë qarkulluar në media për të zënë këtë post janë ato të: Erion Braçes, Besfort Lamallarit, Elisa Spiropalit, Mimi Kodhelit dhe Toni Gogut. Pritet konfirmimi zyrtar i emrit që do të zërë pozicionin e Sandër Lleshajt në ministrinë e Brendshme.
Detaje nga CV-ja e Elira Kokonës
Znj. Elira Kokona është diplomuar në fushën e drejtësisë pranë Universitetit të Tiranës, Fakulteti i Drejtësisë si dhe Universitetit “La Sapienza”, Romë, Fakulteti i Drejtësisë.
Për shumë vite ka punuar si referente ligjore në Sekretariatin e Gjykatës Evropiane të të Drejtave të Njeriut, në Këshillin e Evropës në Strasburg dhe këshilltare programesh pranë Drejtorisë së të Drejtave të Njeriut dhe Demokracisë, në KE, Strasburg.
Anëtare e Dhomave të Avokatisë në Shqipëri dhe Itali, znj. Kokona ka një karrierë të pasur si avokate e associuar në studio ligjore në Tiranë dhe Romë.
Eksperte dhe Lektore e të Drejtave të Njeriut dhe GJEDNJ në Shkollën e Magjistraturës, Shkollën Kombëtare të Avokatisë, fakultete juridike si dhe në programe studimi të të Drejtave të Njeriut, znj. Kokona ka dhënë një sërë seminaresh dhe konferenca kombëtare dhe ndërkombëtare në fushën e jurisprudencës.
Para se të mbante postin e Sekretarit të Përgjithshëm të Ministrisë së Drejtësisë, Znj. Kokona ka mbajtur detyrën e Sekretares së Përgjithshme të Ministrisë së Kulturës si dhe Drejtore Ekzekutive e Shkollës Kombëtare të Avokatisë.
