Kishte muaj të tërë që kryeministri Edi Rama e kishte lënë mënjanë pandeminë në komentet e tij në Facebook. Që pas lirimit nga karantina e parë Rama e kishte kaluar në plan të dytë çështjen e koronavirusit duke ia besuar këtë temë ministres së Shëndetësisë, Ogerta Manastirliu.
Por kreu i qeverisë është rikthyer sërish me komentet dhe me etiketimin e virusit “armik i padukshëm” që thuajse ishte lënë në harresë këto muaj. Në një koment të bërë këtë të hënë, Rama shkruan se tashmë do të sjellë edhe pamje nga spitalet.
“Nesër në këtë faqe filmime krejt ekskluzive nga “vija e zjarrit”, në spitalet Covid ku sistemi ynë shëndetësor, më i gatshëm se asnjëherë më parë dhe heronjtë tanë me bluza të bardha, si asnjëherë më parë përballen me dallgët e forta të një epidemie globale, duke mbrojtur e shpëtuar jetë nga kthetrat e Armikut të Padukshëm…” - shkruan Rama. ©LAPSI.al
