Ishin të shumta dëshmitë se aktori i humorit Koço Devole që humbi jetën nga koronavirusi fillimisht doli nga spitali pasi u tha se u përmirësua, por u rikthye aty pas një përkeqësimi të menjëhershëm. Por ministrja e Shëndetësisë Ogerta Manastirliu e ka mohuar këtë dhe tha se do të ketë një reagim zyrtar.
“Unë nuk mund të përgjigjem konkretisht për asnjë rast. Ju lutem mos më pyesni në këtë mënyrë. Unë jam shumë e prekur për këtë humbje të madhe. Nuk besoj se është ashtu. Për rastin e zotit Devole do të ketë një sqarim zyrtar. Unë nuk besoj se ai është nxjerrë nga spitali dhe është rikthyer sërish brenda disa orëve. Nuk ndodh kjo gjë,” - tha Manastirliu në Opinion.
