Presidenti i Serbisë, Aleksandër Vuçiç ka thënë se po bën përpjekje për të arritur një kompromis me shqiptarët. Teksa fliste me përfaqësuesit e Konventës Kombëtare për Bashkimin Evropian duke iu referuar çështjes së Kosovës, Vuçic u shpreh se ishte kundër një konflikti të ngrirë. Kreu i shtetit serb theksoi se gjëja më e rëndësishme është ruajtja e paqes dhe stabilitetit në rajon, duke sjellë në vëmendje konfliktin e fundit azero-armen.
“Rasti i Armenisë dhe Azerbajxhanit na ka treguar se sa të rrezikshme janë të ashtuquajturat konflikte të ngrira. Sepse një ditë, gjithçka që është e ngrirë do të shkrihet nga dikush”, tha Vuçiç.
Ai vlerësoi se reagimi i ndërkombëtarëve ndaj ripërtëritjes së konfliktit në Nago-Karabak ishte i vakët dhe se kjo mund të shërbente si një mësim për Serbinë. Presidenti Vuçiç tha se politika e jashtme ka dy qëllime kryesore – e para është pozicionimi i vendit dhe ruajtja e stabilitetit politik dhe paqes në rajon, dhe e dyta është përparimi ekonomik i vendit.
