Kryeministri Rama prezantoi një ditë më parë planin e masave ekonomike të përpiluara për t’i bërë ballë pasojave të mëdha që pritet të sjellë përhapja e koronavirusit në Shqipëri. Rama foli për planin A me afat 3 muaj dhe një plan B me afat më të gjatë, por sipas tij mund të ketë edhe një plan C nëse situata shkon vetëm duke u përkeqësuar.
“Para se të vija këtu kam folur me presidentin e Turqisë, me të cilin jam në kontakt të vazhdueshëm dhe prej 2 javësh kemi vendosur në tavolinën e shtetit turk alternativën, pra një listë me kërkesa në rast se do përmbyset bota dhe nuk do ketë asnjë mundësi komunikimi me askënd. Ne mendojmë se duhet të mendojmë edhe për një plan C dhe besoj se e kemi të garantuar me Turqinë” - tha Rama në Opinion.
