Kryetarja e LSI-së Monika Kryemadhi ka rrëfyer një “gabim të madh”, që sipas saj presidenti Ilir Meta nuk ka për t’ia falur kurrë. Ajo thotë se Meta nuk e ka pranuar kurrë vendimin për djegien e mandateve të deputetëve.
“Ilir Meta është shtetar, është njeriu që nuk e ka pranuar djegien e mandateve dhe do ma përmendë deri ditën që do mbyll sytë, sepse është kundër këtij procesi.
Aq radikal është për qëndrime me sovranitetin, aq dhe radikal është për ruajtjen e institucioneve edhe stabilitetit”, - tha Monika e ftuar në emisionin “Provokacija”. Edhe publikisht Meta ka folur kundër djegies së mandateve nga opozita pas marrjes së këtij vendimi.
Sipas Kryemadhit, as SHBA nuk ishte dakord me rrugën e opozitës pasi krijohej precedenti.
“SHBA nuk është dakord me rrugën tonë. Kanë qenë kundër djegies së mandateve, kundër bojkotit të gjitha sepse e quajnë çështje precedenti. SHBA bashkëpunon me çdo qeveri dhe SHBA do të vijojë marrëdhëniet me shqiptarët.
Ne drejtuesit e partive do paguajmë për këtë vendim që kemi marrë, por për ne do ishte më mirë që të dënohem unë e Basha për djegien e mandateve, sesa të kemi një ‘97 të dytë të dënohen shqiptarët. Për ne është më mirë që të dënohemi ne sesa të kemi shqiptarë të vrarë dhe të vijojë kjo shpërngulje masive e shqiptarëve”, - deklaroi Kryemadhi. ©LAPSI.al
