Një shpërthim i fuqishëm tronditi mbrëmjen e së hënës Principatën e Monakos, pranë kufirit me Francën. Autoritetet dyshojnë se bëhet fjalë për një atentat. Bilanci paraprak është tre të plagosur, dy prej tyre në gjendje shumë të rëndë. Mes të plagosurve ndodhet oligarku ukrainas Vadym Ermolaev, bashkëshortja e tij dhe djali 13-vjeçar. Dy të rriturit ndodhen në gjendje kritike, ndërsa i mituri ka pësuar lëndime serioze, por nuk raportohet të jetë në rrezik për jetën.
Shpërthimi ndodhi në një rrugë rezidenciale të Monakos. Sipas hetimeve paraprake, kamerat e sigurisë kanë filmuar një person që la një çantë shpine pranë ndërtesës dhe u largua në këmbë. Pak minuta më vonë ndodhi shpërthimi. Hetuesit po verifikojnë nëse objektivi i sulmit ishte familja e Ermolaevit apo persona të tjerë që ndodheshin në ndërtesë. Policia dhe ekspertët kanë nisur hetimet. Kontrollet janë forcuar në pikat kufitare mes Monakos dhe Francës për të identifikuar autorin e dyshuar.
