Orlando Gill është padyshim një nga heronjtë e Paraguait, që arriti të eliminojë Gjermaninë me penallti në fazën e 1/16-ave të Kupës së Botës dhe të sigurojë kualifikimin për në 1/8-at. Portieri i kombëtares amerikano-jugore u dallua duke pritur dy penallti dhe i dhuroi popullit të tij një kualifikim historik. Një portier që, vetëm 26 vjeç, ka tashmë një histori të veçantë pas vetes. Ai aktivizohet te San Lorenzo de Almagro (Divizioni i Parë argjentinas) dhe e mbylli sezonin me klubin e tij pa marrë pagë prej plot gjashtë muajsh. Situata e San Lorenzos, në fakt, është mjaft e vështirë.
Nga ana financiare, klubi argjentinas ka një borxh total prej 67 milionë dollarësh, përveç 96 proceseve gjyqësore që janë në zhvillim. Futbollistët shpresojnë të shohin dritë në fund të tunelit me nisjen e sezonit të ri, ndërsa San Lorenzo, me bordin e ri drejtues që ka marrë detyrën, po përpiqet me çdo kusht ta zgjidhë situatën. Pavarësisht kësaj, Gill ka arritur të izolojë gjithçka, duke u përqendruar vetëm te rrugëtimi i tij me Paraguain në Botëror. Ai është një portier shumë i vlerësuar nga i gjithë populli i tij dhe pas vetes ka një histori të veçantë që lidhet me djalin e tij.
Rreth tre-katër vite më parë, kur luante te San Lorenzo i Paraguait, Gill u përball me disa probleme shëndetësore të djalit të tij të vogël, Lautaro. Në atë periudhë familja po kalonte një krizë shumë të rëndë ekonomike. Nuk kishin pothuajse asgjë. Kështu, bashkëshortja e tij Melissa, përmes një postimi në Instagram, tregoi se si Orlando Gill, për të përballuar shpenzimet shtesë mjekësore për problemet shëndetësore të të birit, arriti t’i kapërcente vështirësitë ekonomike.
“Kur lindi Lauti, nuk kishim asgjë dhe Orlando u detyrua të shiste të gjitha pajisjet që kishte marrë nga skuadrat ku kishte luajtur për të mbuluar shpenzimet. Djali ynë luftoi për jetën dhe babai i tij ishte gjithmonë pranë! Shiti gjithçka: fanellën e kombëtares U-20, rrobat, atletet. Fjalë për fjalë shiti GJITHÇKA!”, shkroi bashkëshortja e tij në Instagram pas debutimit të burrit të saj me kombëtaren e Paraguait.
Karriera e Gill deri te debutimi në Botëror me Paraguain
Një histori e jashtëzakonshme për një futbollist që, pasi u formua te Club 13 de Junio (2012-2013, ku luante si mesfushor) dhe më pas te CS San Lorenzo i Paraguait (nga viti 2013), debutoi me ekipin e parë rreth viteve 2019-2020 me pak paraqitje në Primera División të Paraguait. Më pas erdhi transferimi në Argjentinë në formë huazimi te San Lorenzo de Almagro në dhjetor 2023, për t’u promovuar më pas në ekipin e parë dhe për t’u blerë përfundimisht në janar 2025 me kontratë deri më 31 dhjetor 2027. Në mes erdhi edhe debutimi me kombëtaren U-20 të Paraguait në vitin 2019 dhe më pas ai me kombëtaren A në vitin 2025. Sot, pas dy penalltive të pritura ndaj Gjermanisë, ka tashmë nga ata që e krahasojnë me José Luis Chilavert. Pavarësisht problemeve të mëdha të klubit, ai vazhdon të ëndërrojë së bashku me një popull të tërë, duke treguar krenari, pasion dhe profesionalizëm.
