Pësuan gol qëllimisht? Algjeria publikon fjalimin e Mahrez: “Duhet të fitojmë”. Pas ndeshjes ai flet ndryshe

Nuk shuhen polemikat pas barazimit 3-3 mes Algjerisë dhe Austrisë. Me këtë rezultat, të dyja skuadrat festuan kualifikimin në fazën e 1/16-ve, por me një veçanti: Austria, si e dyta e grupit, do të përballet me Spanjën, ndërsa Algjeria, si një nga vendet e treta më të mira, do të luajë kundër Zvicrës. Në letër, shorti rezultoi më i favorshëm për Mahrezin me shokë dhe pikërisht për këtë arsye edhe tifozët algjerianë festuan golin e barazimit të Austrisë. Pikërisht këtu shpërtheu polemika. Për Austrinë ishte pothuajse e pamundur të mos dilte e dyta për shkak të golavarazhit më të mirë dhe për këtë arsye barazimi dukej kompromisi ideal për të gjithë. Nëse njëra skuadër do të humbiste, do të eliminohej, ndërsa Irani do të kualifikohej si një nga vendet e treta më të mira.

Me rezultatin 2-2 të konsoliduar, ajo që shkaktoi habi në minutat shtesë ishte goli i Mahrezit, i cili përkohësisht eliminoi Austrinë dhe e çoi Algjerinë drejt një dueli me Spanjën në 1/16-at e finales. Habia e Mahrezit pas golit dhe mosbesimi i tifozëve në tribuna për këtë skenar befasuan të gjithë. Për të larguar çdo dyshim për një “biskotë”, Federata Algjeriane publikoi gjatë natës videon e fjalimit motivues të Mahrez pak para ndeshjes: “Duhet t’i dominojmë, t’i gllabërojmë dhe ta fitojmë ndeshjen, luajmë për këtë.” Megjithatë, më pas në zonën e intervistave ai pranoi: “Ishte e sikletshme, fatmirësisht u kualifikuam të dy.”

Fjalimi motivues i Mahrez para Algjeri-Austri: “Duhet vetëm të fitojmë”

Mahrez, në dhomat e zhveshjes, u përpoq ta bindte skuadrën të zbriste në fushë me bindjen se duhej ta fitonte ndeshjen, duke lënë mënjanë zërat që prej ditësh e përshkruanin këtë duel si një barazim të paracaktuar: “Dëgjoni mirë, djema: kemi folur mjaftueshëm. Tani është koha ta tregojmë vlerën tonë në fushë. Vetë e kemi vendosur veten në këtë situatë, e fituam ndeshjen e dytë. E bëmë detyrën tonë. Tani duhet ta përfundojmë punën.” Më pas kapiteni dhe lojtari më përfaqësues i Algjerisë shtoi:

“Luajmë për t’u kualifikuar dhe për të përfaqësuar vendin tonë, djema. Kemi arritur ta bëjmë këtë vetëm një herë në të kaluarën. Sot kemi mundësinë të shkruajmë sërish histori për kombin tonë. Jo vetëm historinë e futbollit – atë lëreni mënjanë – por historinë e vendit. E gjithë kjo ndodh në fushë, falë cilësive tona.” Mahrez e mbylli fjalimin duke thënë: “Duhet t’i gllabërojmë – në kuptimin e mirë të fjalës, pa marrëzira – duhet të dominojmë çdo duel; ata topa duhet të jenë tanët. Pa lojë të kujdesshme: luajmë për të fituar. Jemi gati, djema? Hajde, hajde, hajde!”

Një fjalim që nuk lë vend për diskutime, nëse nuk do të ishte fakti se më pas, në zonën e intervistave, Mahrez pranoi se ajo që ndodhi në fushë ishte e veçantë. Futbollisti theksoi gjithashtu se ishte i lumtur për golin e Austrisë në fund, i cili i lejoi të dyja skuadrat të festonin kualifikimin. Është e çuditshme të flasësh kështu kur, me fitoren, Algjeria do ta kishte mbyllur grupin në vendin e dytë, duke përmirësuar renditjen e saj…

“E di që situata ishte paksa e sikletshme, për të thënë të drejtën: ne luanim hapur dhe ata qëndronin prapa. Në minutën e fundit, dikush hodhi topin në zonë dhe aksioni u zhvillua, unë duhej ta bëja atë lëvizje – shpjegoi Mahrez duke treguar aksionin e golit. – Duhet ta respektoj futbollin dhe rastin që më krijohet, ndaj duhej të shënoja duke qenë përballë portierit. Ashtu siç edhe ata përpiqeshin të shënonin: ishin në avantazh, fitonin 2-1. E di që është një situatë e sikletshme, por ky është futbolli. Duhet të kesh respekt dhe gjëja pozitive është se për ta përfundoi mirë: shënuan dhe u kualifikuan. U kualifikuam të dy dhe kjo është gjëja më e rëndësishme sot.”