Kërkonte shkëputjen në krye të klasifikimit, por nuk kishte bërrë mirë llogaritë me nevojën e Lacit për pikë: Kukësi shpëton fytyrën vetëm tre minuta nga fundi i ndeshjes, duke u bashkuar me Tiranën e Teutën në kuotën e 7 pikëve. Nuk ia del të bëjnë goditjen e madhe bardhezinjtë e Starovës, që megjithatë i vunë në provë të vështirë Blutë. Nwabueze po demostrohet një sulmues i rëndësishëm, por teknikut të kurbinasve i mungojnë pikët dhe pa atë gol të Em,iliano Mustës, gjërat ndoshta do të ishin ndryshe, por tani mbi Starovën është presioni më i madh ndër pankinat e Superiores, pas vetëm tre ndeshjeve të para...
Në nxehtësinë mbytëse të “Loro Boriçi”, atmosfera ishte krejt ndryshe nga një ditë më parë, ku Vllaznia e Tirana u sfiduan po në Shkodër. Duro hoqi dorë nga 3-5-2 i tij, duke menduar ardhjen në formacion të Abazajt, që po merr kuota me shpejtësi, pavarësisht pankinës së dytë radhazi me Kukësin, por gjërat nuk funksionuan me kurbinasit që mbajtën mirë fushën. Pak raste në total, e akoma më pak kontestime, megjithëse veri-lindorët kanë rezerva për pengimin në zonë të Rrocës në minutën e 18, që arbitri Shahinaj e konsideroi lojë të rregullt.
Duro shpejtoi të fitonte ndeshjen, duke lënë në pushim në dushe Maliqin për Abazaj, por gjërat u përkeqësuan nga një super gol i
Nwabueze. Sulmuesi amerikan lëvizi mes dy mbrojtësve për të mposhtur Avdylin me një të djathtë të fuqishme. Përgjigja e Kukësit ishte në dëshirë, sepse në fushë këmbët janë të rënda, edhe për tre ndeshjet në një javë, e idetë të ngatërruara për shkak të vapës. Por për fatin e Duros, shpëtimin e realizoi Musta tre minuta nga fundi, me një përgjigje të denjë për golin e amerikanit. Pika e parë për Laçin në tre ndeshje, ndërsa Kukësi nuk i bën dot pikë të plota para pauzës për impenjimet e kombëtares.
