Policia e Shtetit ka shpallur në kërkim ish-deputetin e Partisë Demokratike, Bardh Spahia, pas incidenteve të shënuara në mbrëmjen e djeshme në Komisionin Zonal të Administrimit Zgjedhor (KZAZ) në Shkodrës.
Spahia është identifikuar nga Policia si një nga personat përgjegjës për djegien e dy klasave të një shkolle që shërbenin si magazina për materialet zgjedhore, ku mundën të depërtonin mbështetësit e demokratëve. Lidhur me ngjarjen, ditën e sotme, Policia e Shkodrës ka arrestuar 5 persona dhe ka shpallur në kërkim 14 të tjerë.
Në Shkodër dhe në disa qytete të tjera të vendit janë shënuar gjatë ditës së sotme përplasje mes forcave policore dhe përkrahësve të opozitës së bashkuar joparlamentare, për lirimin e ambinteve të zëna nga Komisionet Zonale të Administrimit Zgjedhor (KZAZ), ku parashikohej të zhvilloheshin votimet për zgjedhjet e 30 qershorit. Kryebashkiakët nga radhët e Partisë Demokratike dhe të Lëvizjes Socialiste për Integrim kanë kërkuar respektimin e dekretit të presidentit të Republikës, Ilir Meta, për shtyrjen e zgjedhjeve vendore.
