Në një konferencë rajonale në Shkup të titulluar “Integrimet europiane në udhëkryq” nën organizimin e Klubit të Podgoricës, pjesë e të cilit janë ish–Presidentë dhe Kryeministra të vendeve të rajonit të Kroacisë, Malit të Zi, Kosovës, Maqedonisë, Shqipërisë, Bosnjës dhe Sllovenisë janë kritikuar idetë për korrigjimin e kufijve
Në konferencë ku kanë marrë pjesë ish–Presidenti i Kroacisë Stipe Mesic, ish–Presidenti i Kosovës Fatmir Sejdiu, Ish–Presidentët e Shqipërisë Alfred Moisiu dhe Rexhep Meidani, ish-Presidenti i Maqedonisë Branko Crvenkovski dhe ish-udhëheqës të tjerë të rajonit është miratuar edhe një deklaratë ku theksohet se “anëtarët e Klubit të Podgoricës shprehim gatishmërinë që të bëjnë gjithçka që të parandalojnë që Ballkani Perëndimor përsëri të jetë viktimë e ideve dhe trendëve retrograde”.
Klubi i Podgoricës ndër të tjera ka theksuar se është e një rëndësie të veçantë që BE të aprovojë datën e fillimit të negociatave për anëtarësim të Shqipërisë dhe Maqedonisë së Veriut në BE.
“Shtyrja e mëtejme e këtyre vendimeve në kontekstin e tashmë gjeopolitik dhe gjeoekonomik mund të ketë ndikim të dëmshëm edhe në nivel të brendshëm edhe në atë rajonal. Jemi dëshmitarë të sfidave të rendit global që bazohet në vlerat e përbashkëta dhe demokratike të shoqërive dhe mundësinë që ato të kenë ndikim negativ në Ballkanin Perëndimor”, thuhet në deklaratën e ish-Presidentëve dhe kryeministrave.
Më pas ata kanë bërë edhe një referencë direkte në lidhje me situatën në Kosovë e në Bosnjë e Serbi duke theksuar se idetë retrograde të ndarjeve që i shkojnë kundër bashkëpunimit rajonal e që nxisin izolacionizëm, politikën e kthimit prapa dhe që bazohen në popullizëm në vend se të bazohen në vlerat e përbashkëta dhe standardet europiane, për fat të keq, nuk janë vetëm kujtime të largëta historike por përbëjnë një kërcënim serioz për Ballkanin Perëndimor.
