Kryeqyteti hesht në pritje të derbit. Nuk ka rëndësi nëse luan për mbijetesë, për kampion, apo sa pikë i ndajnë dy skuadrat: ajo që tifozët nuk falin është humbja në derbi. E këto vitet e fundit Tirana e ka provuar ca si shumë. 153 përballje me Partizanin superior në fitore 64-47 dhe golavarazh 216-165, por kur bardheblutë e të kuqtë të zbresin në fushë për të 154 herë në kampionat, të dielën në 16.30, kjo nuk do të ketë asnjë rëndësi.
Tirana është e katërta nga fundi në renditje, 25 pikë diferencën nga Partizani, por është momenti ndoshta i vetëm në këtë 5 vjecar të errët në derbi, ku bardheblutë besojnë se mund ti japin fund një ecurie prej 15 ndeshjen qytetase pa fitore. Është ky momenti, sepse bardhebluve përvec thyerjes së dominimit të kuq ndërqytetas, i duhen pikët për të mbajtur larg Kastriotin, pikërisht një javë para sfidës direkte.
Skuadra e Ardian Memës kërkon të japë sinjalin në ndeshjen e duhur se vështirësitë do të mbeten në këtë sezon dhe se bardheblutë janë kthyer të jenë fanella e rëndë me të cilën prezantohet 24 tituj kampionë në histori. Partizani ndjek një ëndërr, që e merr me vete prej 26 vjetësh atë të rikthimit të trofeut në palmaresin e të kuqve dhe ky është viti ku e realiteti është prekur me dorë dhe mbetet vetëm matematika. Skuadra e Skënder Gegës shpallet kampion edhe duke u mundur, gjithnjë nëse në Gjirokastër nuk fiton Kukësi.
Vetëm se në këtë pikë, ka një motivim më shumë për Tiranën: nuk ka gjë më të bukur se ti shkaktojnë një humbje të besuarve të Skënder Gegës, sa për tia shtyrë edhe pak festën e titullit…ose edhe për ti kujtuar se në vitin që u shpallën kampion ata i mundën në derbi.
