Arsenal-Valencia dhe Eintracht Frankfurt-Chelsea kanë luajtur sot takimet e vajtjes në kuadër të gjysmëfinaleve të Europa League. Arsenal ka triumfuar 3-1 ndaj Valencia, ndërsa Chelsea ka marrë një barazim minimal në ndeshjen që u zhvillua në Gjermani. Kështu pas kësaj fitoreje londinezët e drejtuar nga Unai Emery shkojnë më komodë në ndeshjen e kthimit në Spanjë. Nga ana tjetër, gjithçka ka mbetur e hapur për Chelsea që do të presë në shtëpi Eintracht.
Në "Emirates Stadium" të parët që kaluan në avantazh ishin spanjollët. Mouctar Diakhaby shënoi në minutën e 11' të takimit. Nuk ka vonuar reagimi i vendësve, me Aubameyang që niset me furri për t'i shërbyer më pas një asist Alexandre Lacazzete që shënon në të 18'. Pas vetëm 8' minutash francezi realizoi edhe golin e dytë (26'). I shkëlqyer këtë mbrëmje, Aubameyang shënoi golin e tretë në minutën e 90' duke vulosur rezultatin e ndeshjes.
Në takimin tjetër, gjithcka ka mbetur e hapur pas barazimit 1-1 mes Eintracht Frankfurt dhe Chelsea. Vendësit shënuan të parët me anë të Luka Jovic në minutën e 23'. Por përpara se skuadrat të shkonin në pushimin pas pjesës së parë, Chelsea barazoi rezultatin me Pedro Rodriguez (45'). Edhe futja e Hazard dhe Kovacic në pjesën e dytë, nuk solli asnjë ndryshim për Chelsea, ndërsa nuk pati minuta për Higuain.
