“Unë nuk dua të hamendësoj për gjëra për të cilat nuk kemi fakte. Është e qartë, jo të gjithë e duan Shqipërinë në Europë dhe nuk është një sekret që Rusia nuk e pëlqen Europën e madhe. Dhe kur janë të tilla situata, ata me kënaqësi mund t’i japin një dorë. Kjo nuk do të ishte aspak surprizë”.
Janë fjalët të kryeministrit Edi Rama në emisionin “Porta a porta” në RAI1 pak ditë më parë. Kreu i qeverisë la të kuptonte se protestat në Shqipëri mund të jenë të shtyra nga Moska. Kësaj teorie i kanë fryrë më pas edhe nivelet më të ulëta në qeveri dhe portalet pranë mazhorancës.
I pyetur në emisionin “Zonë e lirë” për këtë teori, kreu i opozitës Lulzim Basha tha se ishte një marrëzi e qeverisë.
“Kjo po që është për humor. Kjo pjesë e propagandës të kujton propagandën e Enverit. Se të rinjtë ndoshta s’e mbajnë mend. Në fund fare, kur nuk ecte asgjë tjetër, shpikej armiku i jashtëm që mbështeste kundërshtarin e brendshëm. Dhe në këtë rast, ata që e kanë shpikur këtë, më duket edhe se janë të kohës së Enverit.
Sa i përket Lulzim Bashës, sa më përket mua, unë jam politikani më proevropian, më evropian në radhë të parë, që ka sot Shqipëria. Ndoshta nesër vjen dikush tjetër më evropian se unë, por deri më sot, politikan më evropian se unë nuk ka. Ndërsa Edi Rama është ai që pret oligarkët rusë në zyrë, i ka pritur prapë Gunvorin, naftën e Shqipërisë jua ka dhënë sot rusëve.
Putini, investim më të mirë se tek Edi Rama nuk ka. Naftën e merr me Gunvorin, sistemin demokratik e ka shkatërruar, me një stil të ngjashëm, dhe agjendën rajonale për ndarjen e Kosovës, Vuçiç e Rama e bëjnë fare mirë, kështu që nuk ka fare nevojë të investohet në asnjë faktor tjetër politik. Dhe padyshim, nuk ka nevojë të investohet tek Lulzim Basha, i cili njihet botërisht për pikëpamjet e tij evropiane dhe atlantiste.” – tha Basha. ©LAPSI.al
