Presidenti i Kosovës, Hashim Thaçi, priti mbrëmjen e djeshme një darkë në shtëpinë e tij udhëheqësit e koalicionit qeverisës të vendit dhe kryeministrin e Shqipërisë. Takimin te Thaçi e ka bërë publik i biri i presidentit, i cili e ka publikuar një fotografi nga darka, sikurse dhe vetë Rama në profilin e tij në Facebook.
Burime të mediave kosovare bëjnë me dije se liderët janë mbledhur tek shtëpia e re e Thaçit në periferi të Prishtinës.
Në foto, Presidenti Thaçi, kryeministri Ramush Haradinaj, kryeparlamentari Kadri Veseli, Edi Rama dhe dy zv.ministrat e Kosovës, Fatmir Limaj e Behgjet Pacolli duken të qeshur.
Takimi mes krerëve të shtetit dhe mysafirit nga Tirana vjen pas përplasjeve mes udhëheqësve të koalicionit qeverisës në Kosovë për taksën ndaj Serbisë e Bosnjës, dhe për përplasjet Thaçi-Haradinaj për tezën e ndryshimit të kufijve me Serbinë.
