Gazetari Jetmir Olldashi pranoi publikisht se ishte autori i investigimit për përfshirjen e vëllait të Fatmir Xhafajt, Agronit në trafik droge. Politizimi i çështjes, rëndësia që mbart një skandal i përmasave të tilla dhe mohimi i përgjimit nga Xhafajt e ka vendosur vetë investigimin në lupën e mediave, që janë marrë me çdo detaj, kontradiktë apo pikë të dyshimtë të tij.
Kështu një moment i paqartë gjatë intervistës së realizuar nga gazetari Jetmir Olldashi me skafistin Albert Veliu, është ai kur gazetari, që ka bërë vetë investigimin, e pyet dëshmitarin, se kush e bëri përgjimin, nëse ka filmime të tjera, si u bë përgjimi etj.
Mbetet e paqartë se pse duhej futur si pykë kjo lojë teatrale mes gazetarit dhe dëshmitarit në mes të intervistës që u transmetua për të gjitha mediat nga selia e PD-së. Misteri i gjenezës së skandalit nxiti, për disa ditë, teoritë konspirative për mënyrën si u realizua investigimi, kush e gjeti dëshmitarin se nga doli përgjimi etj.
Video më poshtë:
https://www.youtube.com/watch?v=jTcosOD7Pb0&feature=youtu.be
Në këtë aventurën tënde që thua se e provove e bëre, ke bërë filmime të tjera?
Filmime të tjera unë s’kam bërë, filmime të tjera. Filmimet i ka bërë vetë Agroni, nuk i kam bërë unë dhe aty janë.
Si i ka bërë?
Po ku di gjë unë si i ka bërë, me dashje, pa dashje, i di Agroni, jo unë.
Po ti thua që Agroni ka përgjuar veten?
Po normale, ku di unë ça i është vënë Agronit dhe akuzon Andonin në anën tjetër. Ato të gjitha janë gjëra që janë fakte reale, si zëri që ne kemi folur. Gjithmonë e ha një fukara, nuk e ha një i pasur.
Po ti vetë kur e kujtove bisedën, kur pe këto video përgjimet e kujtove bisedën?
Po normale. Kur unë e pash te djali, te lokali të gjitha këto foljet që u bënë, doli. Të gjitha thëniet që ne kemi bërë, thashë çne këto përgjime ne?!
Domethënë, ti mendon që Agronin e kanë përgjuar të tjerët?
Normale unë s’kam lidhje.
Nuk e ke përgjuar ti?
Secili ka mbrojtjen e tij ore. Ai tijën, unë timen, po nga ka ardhë kjo, e gjen Agroni, këto përgjime. Këto janë gjërat që po të them unë.
Gjatë deklaratës për mediat, gazetari Jetmir Olldashi pranoi se kjo ishte një çështje sensitive dhe tha se ka qenë vazhdimisht nën presion për skandalin e Agron Xhafajt, duke i kërkuar kolegëve t'i rezistojnë "presioneve që do të nisin sapo të largoheni nga kjo zyrë, nga shumë drejtime, për të goditur punën time dhe mua nëpërmjet shpifjeve, fyerjeve dhe të pavërtetave".
