Lulzim Basha kërkoi dorëheqjen e Fatmir Xhafajt për t'i hapur rrugë hetimeve nga prokuroria për aktivitetin e vëllait të tij në Shqipëri dhe mbrojtjen që i ka garantuar ai si Ministër i Brendshëm.
Gjatë një konference për mediat, Basha përsëriti akuzat se Fatmir Xhafaj ka mbrojtur të vëllain nga ekstradimi dhe ka lejuar vazhdimin e aktivitetit të tij kriminal, në trafikun e drogës nga Shqipëria.
"Në këtë situatë duhej që ndaj vetë Fatmir Xhafës të kishte nisur një hetim i gjithanshëm nga Prokuroria" u shpreh Basha që pati 4 kërkesa për prokurorinë.
1. Fatmir Xhafaj duhet t’i nënshtrohet së pari hetimit të ligjit antimafia për pasuritë si familjar i personave me aktivitet mafioz.
2. Së dyti, duhet të hetohen të gjitha veprimet dhe mos veprimet e Fatmir Xhafajt, si Ministër i Brendshëm, si rezultat i të cilave, vëllai i tij Agron Xhafaj i dënuar për trafik ndërkombëtar droge nga drejtësia Italiane me 7 vjet e 2 muaj nuk ka bërë asnjë ditë të vetme burg, as në Itali dhe as në Shqipëri.
3. Së treti, duhet të hetohen të gjitha veprimet dhe mosveprimet e Fatmir Xhafajt, si Ministër i Brendshëm, si rezultat i të cilave Agron Xhafaj i ka shpëtuar vuajtjes së dënimit.
4. Së katërti, duhet të hetohen të gjitha veprimet dhe mos veprimet e Fatmir Xhafajt, si Ministër i Brendshëm, që mundësojnë vazhdimin e aktivitetit kriminal të Agron Xhafaj.
Ministria e Brendshme, as Policia, as Prokuroria e kapur nga dyshja Rama-Xhafa nuk vepron dhe nuk do të veprojë sa kohë Fatmir Xhafaj është ministër i Brendshëm, eprori politik i Policisë që kryen verifikimet dhe hetimet dhe padroni politik i Arta Markut dhe Donika Prelës" tha kreu i demokratëve, Lulzim Basha.
