Në kulmin e debatit për zgjedhjen e një Prokurori të ri të Përkohshëm, ambasadori amerikan Donald Lu ka thyer heshtjen me një deklaratë që nxit largimin e Adriatik Llallës nga prokuroria.
“Kushtetuta dhe ligji për Prokurorinë janë të qarta. Ambasada e Shteteve të Bashkuara mbështet opinionin ligjor që OPDAT dhe EURALIUS i kanë dhënë Parlamentit. Ne nxisim Parlamentin të zbatojë ligjin” është deklarata e shkurtër dhe e qartë e ambasadorit amerikan.
Dy misionet që asistojnë Shqipërinë në fushën e ligjit, ai i Bashkimit Europian, Euralius dhe ai i Shteteve të Bashkuara OPDAT, sugjeruan që Prokurori i Përgjithshëm i përkohshëm të zgjidhet nga Parlamenti. Sipas Euralius dhe Opdat ky Prokuror i Përgjithshëm i përkohshëm do të mund të zgjidhet edhe me vetëm 36 vota.
Juristët e huaj saktësuan se parlamenti nuk ka autoritet kushtetues, ose ligjor që të zgjasë mandatin e kryeprokurorit aktual, pas skadimit të mandatit të tij.©Lapsi.al
